Կենտրոնական ընտրական հանձնաժողովը համաձայնություն է տվել Նարեկ Կարապետյանի նկատմամբ մեղադրանք առաջադրելուն, լրագրողներին հայտնել է, փաստաբան, «Ուժեղ Հայաստան» դաշինքի պատգամավոր Արամ Վարդևանյանը:
Նրա խոսքով՝ այդ որոշումը չի նշանակում համաձայնություն Կարապետյանին ազատությունից զրկելուն, թեև որոշ լրատվամիջոցներ այն հենց այդպես են ներկայացրել։
«Տեսա, որ մի քանի լրատվամիջոց նման վերնագրեր էին օգտագործել։ Սա անձեռնմխելիությունից զրկում չէ։ Խոսքը վերաբերում է միայն մեղադրանք առաջադրելու համաձայնությանը»,- ասել է Վարդևանյանը։
Փաստաբանի խոսքով՝ դրանից հետո ԿԸՀ-ն անցել է դատախազության երկրորդ միջնորդության քննարկմանը՝ Կարապետյանի նկատմամբ ազատազրկման ձևով խափանման միջոց կիրառելուն համաձայնություն տալու հարցին։ ԿԸՀ նիստը կշարունակվի ժամը 15:30-ին, որից հետո հայտնի կդառնա դատախազության երկրորդ միջնորդության հարցով հանձնաժողովի որոշումը։
«Ազատությունից զրկելու համար կրկին ԿԸՀ-ն կրկին պետք է համաձայնություն տա։ Նարեկ Կարապետյանն արդեն իսկ պատգամավոր է, այլ հարց է, որ նա լիազորությունները չի ստանձնել, ինչպես մեզնից յուրաքանչյուրը»,- նշել է փաստաբանը։
Վարդևանյանի խոսքով՝ պաշտպանական կողմը հանձնաժողովին ներկայացրել է իրավական հիմնավորումներ, որոնց համաձայն Կարապետյանն արդեն ունի պատգամավորի կարգավիճակ, թեև դեռ չի ստանձնել պատգամավորի լիազորությունները։
Նա նաև հայտարարել է, որ Կարապետյանը ձևավորվող խորհրդարանական խմբակցության առանցքային դերակատարներից է, հետևաբար պաշտպանական կողմի գնահատմամբ, Կարապետյանի նկատմամբ քրեական հետապնդումն ուղղված է ոչ միայն անձամբ նրա, այլև «Ուժեղ Հայաստանի» քաղաքական գործունեությունը խոչընդոտելուն։
Վարդևանյանի խոսքով՝ պաշտպանական կողմը նիստում ներկայացրել է ինչպես իրավական, այնպես էլ քաղաքական փաստարկներ, սակայն, նրա պնդմամբ, դատախազությունը դրանց վերաբերյալ հակափաստարկներ չի ներկայացրել։
Փաստաբանը հավելել է, որ Սահմանադրական դատարանի որոշման համաձայն՝ պատգամավորի կարգավիճակ ձեռք բերելու պահից ընտրված պատգամավորը չի կարող ազատությունից զրկվել, իսկ համաձայնություն կարող է պահանջվել միայն նրա նկատմամբ քրեական հետապնդում հարուցելու համար։
«Երեկ Նարեկ Կարապետյանը ստացել է պատգամավորի կարգավիճակ։ Այդ դեպքում պարզ հարց է առաջանում՝ ինչո՞ւ դատախազը չսպասեց Դավիթ Ղազինյանին պատգամավորական վկայականի տրամադրմանը և քրեական վարույթի նյութերը ներկայացրեց դատարան։ Որովհետև իրենք էլ հասկանում են այդ կարգավիճակի նշանակությունը»,- հայտարարել է Վարդևանյանը։
Սահմանադրական իրավունքի մասնագետ, «Ուժեղ Հայաստան» դաշինքի անդամ Գոհար Մելոյանն իր հերթին հայտարարել է, որ ԿԸՀ-ն և իրավապահ մարմինները դիմում են իրավական տարամեկնաբանությունների՝ դաշինքի պատգամավորների, մասնավորապես՝ Նարեկ Կարապետյանի և Դավիթ Ղազինյանի նկատմամբ քաղաքական հետապնդումներ իրականացնելու և նրանց ապօրինաբար ազատությունից զրկելու համար։
Մելոյանի համոզմամբ՝ պատգամավորական մանդատների ու վկայականների տրամադրման պահից բոլոր ընտրված թեկնածուներն օրենքի ուժով ձեռք են բերել պատգամավորի կարգավիճակ և Սահմանադրության 96-րդ հոդվածով սահմանված անձեռնմխելիություն։ Նա ընդգծել է, որ իշխանությունները կիրառում են երկակի ստանդարտներ՝ «Քաղաքացիական պայմանագիր» խմբակցության պատգամավորներին թույլ տալով իրականացնել լիազորությունները, մինչդեռ ընդդիմադիրների պարագայում պնդում են, թե լիազորությունները դեռ ուժի մեջ չեն մտել։
Անդրադառնալով իր ինքնաբացարկին՝ Մելոյանը հերքել է թիմում որևէ տարաձայնության առկայությունը՝ նշելով, որ այսօր իրենց առաջնահերթությունը «Ուժեղ Հայաստան» խմբակցության առաջին համար Նարեկ Կարապետյանի և մյուս գործընկերների ապօրինի մեկուսացումը թույլ չտալն է։
Ավելի վաղ դատախազությունն Armenia Today-ին հայտնել էր, որ չի կարող բացահայտել միջնորդության բովանդակությունը՝ «նախաքննության շահերից ելնելով»։ Կարապետյանը գլխավորում է խորհրդարանում 29 մանդատ ունեցող երկրորդ քաղաքական ուժը։ Դաշինքի առաջնորդ Սամվել Կարապետյանն ավելի վաղ հայտնել էր, որ Նարեկ Կարապետյանը պատրաստվում է վերցնել մանդատը։
Կարապետյանը մայիսին հայց էր ներկայացրել ՀՀ քննչական կոմիտեի դեմ՝ պահանջելով հերքել իր հասցեին տարածված և իրականությանը չհամապատասխանող այն տեղեկությունները, թե թաքցրել է այլ պետության քաղաքացիություն ունենալու փաստը։
