Հայստանի ֆուտբոլի ֆեդերացիայի (ՀՖՖ) նախագահի պաշտոնի հավակնորդների թվում շրջանառվում են ԱԺ նախկին պատգամավոր Սիսակ Գաբրիելյանը, ՀՀ շրջակա միջավայրի նախարար, ԱԺ պատգամավոր ընտրված Հակոբ Սիմիդյանի և Բարձր տեխնոլոգիական արդյունաբերության նախարար Մխիթար Հայրապետյանի անունները, հայտնում է «Ժողովուրդ»-ը։
Ըստ լրատվականի՝ յուրաքանչյուրի շուրջ տարբեր շրջանակներ փորձում են մինչև ընտրություններ ձևավորել քաղաքական և ֆուտբոլային աջակցություն։
Թերթի տեղեկություններով՝ ՀՀ վարչապետ Նիկոլ Փաշինյանը ֆուտբոլային ակումբների ղեկավարների հետ հանդիպման ժամանակ նշել է, որ ՀՖՖ նախագահի ընտրության հարցն «ինքը կլուծի»։
2024 թվականի հոկտեմբերին, UEFA-ի Ազգերի լիգայի Հյուսիսային Մակեդոնիայի հետ խաղում Հայաստանի հավաքականի պարտությունից հետո, որին հաջորդել էր հավաքականի գլխավոր մարզիչ Ալեքսանդր Պետրակովի պաշտոնանկությունը, ֆան-շարժումների ներկայացուցիչները պահանջել էին ՀՖՖ նախագահ Արմեն Մելիքբեկյանի հրաժարականը: Նույն տարվա հոկտեմբերի 14-ին ՀՖՖ-ն հայտարարել էր, որ նախագահի հրաժարականի հարց չի քննարկվում:
2025-ի հունվարի 30-ին երկրպագուները ՀՖՖ-ին մեղադրել էին ազգային հավաքականի խաղերին իրենց ներկայությունը կանխելու մեջ։ ՀՖՖ-ն երկրպագուներին կոչ էր արել ակցիաներ չիրականացնել՝ ընդգծելով, որ դա կարող է վնաս հասցնել հայկական ֆուտբոլին։
Հոլանդական «Այաքս»-ի, Մոսկվայի «Սպարտակ»-ի ու Հայաստանի ազգային հավաքականի նախկին ֆուտբոլիստ Արազ Օզբիլիսը ՀՖՖ-ին «հայկական ֆուտբոլը քանդելու մեջ» էր մեղադրել։
Մելիքբեկյանի հեռացման պահանջով դժգոհությունների նոր ալիքն սկսվել էր 2025 թվականի մարտի 20-ին, երբ 1։6 հաշվով Վրաստանի հավաքականից կրած պարտությունից հետո Մելիքբեկյանը ներողություն էր խնդրել երկրպագուներից, իսկ Հայաստանի հավաքականի երկրպագուները խաղի ընթացքում պահանջել էին նրա հրաժարականը։ Խաղի ավարտից հետո հարյուրավոր երկրպագուներ ներխուժել են խաղադաշտ, իսկ տրիբունաներում բախումներ են եղել։
ՀՖՖ-ին քննադատել էր նաև հավաքականի նախկին ֆուտբոլիստ Արազ Օզբիլիսը՝ հայտարարելով, որ ֆեդերացիան «քանդում է» հայկական ֆուտբոլը։ Մելիքբեկյանը հայտարարել էր, որ 2027 թվականին չի պատրաստվում կրկին առաջադրվել ՀՖՖ նախագահի պաշտոնում։ ՀՖՖ նախագահի հրաժարականին էին միացել նաև Պրեմիեր լիգայում հանդես եկող մի շարք ակումբներ։
