Ամռան սկզբին արձանագրված անոմալ բարձր ջերմաստիճանը Գերմանիայում 5120 մարդու մահվան պատճառ է դարձել, գրել է Telegraph-ը՝ հղում անելով Ռոբերտ Կոխի ինստիտուտի (RKI) տվյալներին։
Նշվում է, որ մահացածների մեծ մասը տարեցներ և քրոնիկ հիվանդություններ ունեցող անձինք են։
Գերմանիայի վիճակագրական ծառայության (Destatis) փոխանցմամբ՝ հունիսին, երբ ջերմաստիճանը հասել է մինչև 41 աստիճանի, երկրում մահացության ընդհանուր ցուցանիշն աճել է 30%-ով։ Ըստ նույն ծառայության տվյալների՝ արևմտյան Ռեյնլանդ-Պֆալց նահանգում զոհերի թիվը կազմել է շուրջ 560, ինչը կրկնակի գերազանցում է նախորդ տարվա ցուցանիշը։
ԶԼՄ-ն գրել է, որ ըստ RKI-ի գիտնականների պարզաբանման, շատ դեպքերում անոմալ շոգը մահվան վկայականներում չի նշվում որպես առաջնային պատճառ, քանի որ մահացությունը հիմնականում բարձր ջերմության և նախկինում առկա առողջական խնդիրների համադրության հետևանքով է վրա հասնում։
Պարբերականը նաև հաղորդել է, որ Եվրոպական կլիմայական ծառայության Copernicus տվյալներով՝ Արևմտյան Եվրոպայում հունիսին միջին ջերմաստիճանը հասել է 20,74 աստիճանի, ինչը 3 աստիճանով բարձր է նորմայից և հանդիսանում է պատմական ռեկորդ։
Կլիմայի փոփոխության հետևանքով առաջացող «ջերմային գմբեթների» պատճառով հազարավոր մահվան դեպքեր են գրանցվել նաև Ֆրանսիայում, Իսպանիայում ու Բելգիայում, գրել է պարբերականը։
Le Monde-ի տվյալներով՝ Ֆրանսիայում արդեն երկրորդ անգամ հայտարարվել է եղանակային վտանգի ամենաբարձր՝ «կարմիր» մակարդակ՝ ծայրահեղ շոգի պատճառով։ Կայքի տեղեկություններով՝ գրեթե ամբողջ Ֆրանսիան գտնվում է նարնջագույն զգուշացման ռեժիմում, և առաջիկա օրերին սպասվում է ջերմաստիճանի բարձրացում։
Օդերևութաբանների կանխատեսմամբ՝ առաջիկա հանգստյան օրերին Փարիզում օդի ջերմաստիճանը կարող է գերազանցել 35 աստիճանը։ Շաբաթ օրը առավելագույն եղանակային վտանգի ռեժիմը կգործի երկրի 24 դեպարտամենտում, որտեղ բնակվում է շուրջ 21,9 միլիոն մարդ։
Ֆրանսիայի օդերևութաբանական ծառայության տվյալներով՝ առանձին շրջաններում ջերմաստիճանը կարող է հասնել մինչև 41 աստիճանի։
Միջին հեռահարության եղանակի կանխատեսումների եվրոպական կենտրոնի փորձագետ Սամանտա Բուրգեսի փոխանցմամբ՝ կլիմայական փոփոխություններն իրականություն են և առօրյա կյանքը վերածվում են խաթարող ներկայի։
