Երևանի «Գլասբո կլինիկա» բժշկական կենտրոնում ծնվել են հայրենիքի պաշտպանության ժամանակ նահատակված արցախցի զինվոր Գոռ Ղուկասյանի եղբայրները, տեղեկանում ենք բժշկական կենտրոնի ֆեյսբուքյան էջից։
Երեխաները ծնվել են 41 սմ հասակով և յուրաքանչյուրը 2,3 կգ քաշով։ Ծնողները նորածին տղաներին անվանել են Գոռ և Հայկ։
Բժշկական կենտրոնի փոխանցմամբ՝ հերոսի անունը կշարունակի ապրել նորածին եղբոր մեջ, իսկ Հայկ անունը կխորհրդանշի ընտանիքի վերածնունդն ու ուժը։
«Երկու փոքրիկ սրտեր սկսեցին բաբախել այն տանը, որտեղ երկար ժամանակ տխրություն էր տիրում։ Երկու մանկական ձայներ հնչեցին այնտեղ, որտեղ մի ժամանակ լռություն էր»,- ասված է ԲԿ-ի տարածած հայտարարության մեջ։
Գոռ Ղուկասյանը ծնվել էր 2002 թվականին Ստեփանակերտում և ընտանիքի միակ որդին էր։ Նա սովորել էր տեխնոլոգիական համալսարանում։
2020 թվականի 44-օրյա պատերազմի ժամանակ նա ծառայել էր առաջնագծում և մասնակցել մարտական գործողություններին։ Պատերազմից հետո նա շարունակել էր ծառայել Հայաստանի Ազգային անվտանգության ծառայության սահմանապահ զորքերում։
2023 թվականի ապրիլին Ղուկասյանն ամուսնացել էր, սակայն ամուսնությունը տևել էր մոտ հինգ ամիս։
2023 թվականի սեպտեմբերի 19-ին նա զոհվել էր Մարտակերտի շրջանի Ճանկաթաղ գյուղի մոտ տեղի ունեցած մարտում։ Ընտանիքի խոսքով՝ նրա ստորաբաժանումը գտնվում էր ամենալարված շրջաններից մեկում և պահպանում էր իր դիրքերը։
Զինվորի մարմինը հայտնաբերվել էր մի քանի օր անց։ Սեպտեմբերի 30-ին նրան հուղարկավորել էին Երևանի Եռաբլուր զինվորական պանթեոնում։ Գոռը 21 տարեկան էր։
