Վարչապետ Նիկոլ Փաշինյանը Եվրոպական Միության անդամ պետությունների դեսպանների հետ քննարկել է ԵՄ-ի հետ համագործակցության օրակարգին վերաբերող հարցեր, հայտնել է կառավարության մամուլի ծառայությունը։
Հանդիպմանը մասնակցել է նաև ՀՀ-ում ԵՄ պատվիրակության ղեկավար Վասիլիս Մարագոսը։
Դեսպանները շնորհավորել են վարչապետ Փաշինյանին՝ Հայաստանում անցկացված համապետական խորհրդարանական ընտրությունների արդյունքների առթիվ, ընդգծվել է ԵՄ-ի աջակցությունը ՀՀ-ում ժողովրդավարության ամրապնդմանը։
Նշվում է, որ հանդիպման ընթացքում քննարկվել են ԵՄ-ի օժանդակությունը բարեփոխումների օրակարգի, իրավունքի գերակայության ամրապնդման, տնտեսական համագործակցության, ենթակառուցվածքների զարգացման, էներգետիկ դիմակայունության, ինչպես նաև տարածաշրջանային կայունության և խաղաղության օրակարգի շուրջ։
Հունիսի 18-ին, «Ուժեղ Հայաստան» դաշինքի առաջնորդ Սամվել Կարապետյանը ԶԼՄ-ների գլխավոր խմբագիրների հետ հանդիպման ժամանակ հայտարարել էր, որ Փաշինյանն օգտագործում է Ռուսաստանի և Արևմուտքի միջև առկա դիմակայությունը իշխանությունը պահպանելու համար: Նրա կարծիքով՝ վարչապետը համոզել է եվրոպացի գործընկերներին հակառուսական կուրսի շահավետության հարցում, թեև, ինչպես պնդում է Կարապետյանը, այն հակասում է Հայաստանի շահերին:
Նրա խոսքով՝ միավորված ընդդիմության խնդիրներից մեկը կլինի միջազգային կառույցների և դիվանագետների հետ կապերի հաստատումը՝ նրանց սեփական դիրքորոշումը ներկայացնելու համար: Կարապետյանը հավելել է, որ դեռևս չի հանդիպել ոչ արևմտյան դիվանագետների, ոչ էլ Ռուսաստանի ներկայացուցիչների հետ, սակայն նման երկխոսության ակնկալիք ունի ընտրություններից հետո:
