Խորհրդարան անցած ընդդիմադիր ուժերը պատգամավորական մանդատները վերցնելու հարցում դեռևս վերջնական որոշում չունեն, գրել է «Ժողովուրդ» օրաթերթը՝ հղում անելով իր աղբյուրներին։
Պարբերականի տեղեկություններով՝ «Հայաստան» դաշինքի ղեկավարությունը դիտարկում է մանդատները չվերցնելու տարբերակը, սակայն սպասում է մյուսների հետ միասնական դիրքորոշման ձևավորմանը։
Միևնույն ժամանակ, ըստ թերթի, «Ուժեղ Հայաստան» կուսակցության ներսում երկու տարբերակ են քննարկում՝ կա՛մ չվերցնել մանդատները, կա՛մ գնալ ԱԺ և ամբիոնն օգտագործել քաղաքական պայքարը շարունակելու համար։
ArmLur.am-ը, հղում անելով իր աղբյուրներին, հավելել է, որ որ մինչ այս պահը կուսակցության թիմի անդամները չեն հանդիպել «Ուժեղ Հայաստանի» առաջնորդ Սամվել Կարապետյանին։
Ընդդիմադիրների այս իրավիճակի վրա կարող է ազդել նաև «Բարգավաճ Հայաստան» կուսակցության (ԲՀԿ) համար իրականացվող քվեների վերահաշվարկը, որին անցողիկ շեմը հաղթահարելու համար պակասում է 70 ձայն, գրել է օրաթերթը։
Հունիսի 7-ին կայացած խորհրդարանական ընտրություններից հետո ընդդիմադիր ուժերը հանդես էին եկել քվեարկության արդյունքների վերանայման պահանջով։
«Ուժեղ Հայաստան» կուսակցությունը պաշտոնապես պահանջել էր արդյունքների վերահաշվարկ իրականացնել շուրջ 50 ընտրատեղամասում՝ մատնանշելով արձանագրված խախտումները։
Իր հերթին՝ «Հայաստան» դաշինքից Իշխան Սաղաթելյանը հայտարարել էր ընտրությունների արդյունքները Սահմանադրական դատարանում վիճարկելու մտադրության մասին։
ԲՀԿ-ն նույնպես դիմում էր ներկայացրել Կենտրոնական ընտրական հանձնաժողով՝ պահանջելով քվեների վերահաշվարկ։ Նախնական տվյալներով՝ կուսակցությունը հավաքել է ձայների շուրջ 4%-ը։ Միևնույն ժամանակ, դատախազությունից Armenia Today-ին հայտնել էին, որ ԲՀԿ առաջնորդ Գագիկ Ծառուկյանի նկատմամբ հարուցված քրեական գործի մեղադրական եզրակացության հիման վրա նրան արգելված է լքել երկիրը։ Գործը վերաբերում է առանձնապես խոշոր չափերով հարկերից խուսափելուն։
ԿԸՀ-ն խորհրդարանական ընտրությունների վերջնական արդյունքները նախատեսում է հրապարակել հունիսի 14-ին։
