Դատարանը կալանավորել է «Ուժեղ Հայաստան» դաշինքի վեց աջակցի, երբ Տաշիրի Մեծավան գյուղում մայիսի 16-ին նախընտրական քարոզչություն իրականացնող դաշինքի համակիրները «Սամվե՛լ, վարչապետ» վանկարկումներով դիմավորել էին Պաշտպանության նախարար Սուրեն Պապիկյանին, որը «Քաղաքացիական պայմանագրի» հետ քարոզարշավ էր իրականացնում։
«Ուժեղ Հայաստանի» ձերբակալված աջակիցների մասին Armenia Today-ին հայտնել են Քննչական կոմիտեի մամուլի ծառայությունից։
ՔԿ-ից հստակեցրել են, որ ևս մեկ ձերբակալվածի նկատմամբ կիրառվել է տնային կալանք, իսկ մյուս երեք անձի վերաբերյալ դատական նիստերը դեռևս նշանակված չեն։
Հրապարակված կադրերում երևում է, թե ինչպես են «Ուժեղ Հայաստանի» աջակիցները դրոշներով վանկարկում «Սամվել Կարապետյան, վարչապե՛տ»։
Այնուհետև դեպքի վայր էր ժամանել ՔՊ կողմնակիցների ավտոշարասյունը։ Մի քանի պտույտ կատարելուց հետո մեքենաներն ուղղվել էին դեպի դաշինքի աջակիցները և փորձել էին ճեղքել նրանց շղթան, որից հետո Պապիկյանը դիմել էր ոստիկանությանը՝ պահանջելով վերականգնել կարգուկանոնը, ինչից հետո իշխող ուժի աջակիցների շարասյունը կրկին շարժվել էր դեպի Կարապետյանի համակիրներ և, բախվելով նրանց հետ, ճեղքել շարքերը։
Գործը, որով անցնում են ձերբակալվածները, վերաբերում է մի խումբ անձանց կողմնակից նախընտրական քարոզչության իրականացմանը ենթադրյալ խոչընդոտելուն։ Այն հարուցվել է ՀՀ քրեական օրենսգրքի 211-րդ հոդվածի 2-րդ մասի 5-րդ կետի հատկանիշներով (որպես առավելագույն պատիժ նախատեսում է ազատազրկում՝ 6 տարի ժամկետով)։
«Ուժեղ Հայաստան» դաշինքում ընդգծել էին, որ պատահարի պահին դաշինքի համակիրներն իրականացնում էին խաղաղ ակցիա՝ կուսակցական խորհրդանիշներով, երբ ՔՊ ներկայացուցիչները՝ Պապիկյանի գլխավորությամբ, չնայած այլընտրանքային երթուղու առկայությանը, ուղղվել էին դեպի ակցիայի մասնակիցները՝ բախում հրահրելու նպատակով։
Պապիկյանն, իր հերթին, մեղադրել էր «Ուժեղ Հայաստանի» ներկայացուցիչներին սադրանքի փորձի մեջ։
ՔԿ-ն նույնպես իր մեղադրական եզրակացության մեջ պնդում է, որ «Ուժեղ Հայաստանի» աջակիցները, տեղեկանալով ՔՊ-ի քարոզարշավի նախապես հայտարարված վայրի մասին, միտումնավոր խոչընդոտել են քարոզչության իրականացմանը։
ՔԿ-ն դաշինքի ներկայացուցիչներին նաև մեղադրել է ՔՊ-ի կողմնակիցների նկատմամբ բռնություն կիրառելու մեջ։
Դաշինքի քաղաքական խորհրդի անդամ Նարեկ Կարապետյանը մայիսի 16-ին քննադատել էր ուժային կառույցների և անձամբ Պաշտպանության նախարարի գործողությունները՝ հայտարարելով, որ ցավում է նրա վարքագծի համար։
Ի պատասխան Կարապետյանի հայտարարությունների՝ Պապիկյանը մեղադրել էր «Ուժեղ Հայաստանին» կանխամտածված սադրանքի մեջ և սպառնացել՝ հայտարարելով. «նմանատիպ դեպքերի կրկնության պարագայում շարունակելու ենք տրորելով անցնել ձեր վրայով»։
