Սիրիայի հյուսիսում գտնվող տարածքներից քրդական ուժերի դուրսբերումից հետո Սիրիայի կառավարական ուժերի և քրդերի գլխավորած կոալիցիայի՝ Սիրիայի դեմոկրատական ուժերի (SDF) միջև բախումներ են սկսվել, հայտնում է Reuters-ը։
Ավելի վաղ, քրդերի հետ համաձայնագրի շրջանակներում, սիրիական բանակն սկսել էր վերահսկողություն հաստատել Հալեպի նահանգի՝ նախկինում SDF-ի կողմից վերահսկվող տարածքների նկատմամբ։ Կառավարական ուժերը մտել էին Դեյր Հաֆեր, որը գտնվում է Հալեպից 50 կիլոմետր արևելք, երբ SDF-ն հայտարարել էր, որ սկսել է դուրս բերել իր ուժերը։
Բախումները տեղի են ունեցել, երբ սիրիական բանակը հայտարարել է Ռաքքա նահանգում Եփրատ գետի արևմտյան ափին գտնվող Տաբկա քաղաքը գրավելու մտադրության մասին, որտեղ նահանջել էին SDF-ի ուժերը։ Քրդական կոալիցիան հայտարարել է, որ կառավարական ուժերի առաջխաղացումը դեպի քաղաք Դամասկոսի հետ նախնական համաձայնագրի մաս չի կազմել։
SDF-ն հայտարարել է քաղաքի, ինչպես նաև տարածքի նավթահանքերի վրա վերահսկողությունը պահպանելու համար պայքարելու մտադրության մասին։ Սիրիական բանակը հայտնել է քուրդ զինյալների հարձակումների հետևանքով իր չորս զինվորի մահվան մասին։ SDF-ը նաև հայտնել է իր մի քանի մարտիկի մահվան մասին, բայց չի ներկայացրել զոհերի ճշգրիտ թիվը։
ՏԱՍՍ-ի փոխանցմամբ՝ Սիրիայի ժամանակավոր կառավարությունը պահանջել է, որ SDF-ն ամբողջությամբ դուրս բերի իր զորքերը Եփրատ գետից արևելք և ապառազմականացնի Թաբքան, որի մոտ է գտնվում Եփրատի ամբարտակը: Գործակալության տվյալներով՝ սիրիական բանակը նաև ռազմական գործողություններ է սկսել Ռաքքայից արևելք գտնվող քրդերի դեմ:
Հունվարի սկզբին Հալեպում բախումներ էին սկսվել Դամասկոսի կառավարական զորքերի և Սիրիայի դեմոկրատական ուժերի միջև։ Հունվարի 11-ին քրդական ստորաբաժանումներն ամբողջությամբ լքել էին քաղաքը կրակի դադարեցման և մարդկանց անվտանգ դուրս բերելու մասին պայմանավորվածությունից հետո:
