Քրդերի գլխավորած Սիրիայի դեմոկրատական ուժեր (SDF) կոալիցիայի վերջին մարտիկները Հալեպը լքել են հունվարի 11-ին, հաղորդում է Reuters-ը՝ հղում անելով Սիրիայի պետական «Էխբարիա» հեռուստաալիքին։
Սիրիայի դեմոկրատական ուժերի հրամանատար Մազլում Աբդին հայտարարել է, որ կոալիցիան միջազգային միջնորդությամբ համաձայնության է եկել հրադադարի և Հալեպի Աշրաֆիե ու Շեյխ Մաքսուդ թաղամասերից խաղաղ բնակիչների, ինչպես նաև զինյալների՝ դեպի Սիրիայի հյուսիս և արևելք անվտանգ տարհանման վերաբերյալ։
Սիրիայի անվտանգության ծառայություններում, գործակալության աղբյուրների փոխանցմամբ, հունվարի 10-ի գիշերը Հալեպից երկրի հյուսիս-արևելք գաղտնի տեղափոխվել էր քուրդ մարտիկների մի խումբ, այդ թվում՝ որոշ հրամանատարներ և նրանց ընտանիքները։
ԱՄՆ Սիրիայի հարցերով հատուկ դեսպանորդ Թոմ Բարաքը հայտարարել էր, որ Դամասկոսում հանդիպել է Սիրիայի ժամանակավոր նախագահ Ահմեդ ալ-Շարաայի հետ և կոչ արել բոլոր կողմերին «դրսևորել առավելագույն զսպվածություն, անհապաղ դադարեցնել ռազմական գործողությունները և վերադառնալ երկխոսության»։ Դիվանագետի խոսքով՝ ԱՄՆ պետքարտուղար Մարկո Ռուբիոյի թիմը պատրաստ է միջնորդել իրավիճակի կարգավորմանը։
Գործակալությունը նշում է, որ քրդական ուժերը 2011 թվականից ի վեր վերահսկում են Հալեպի երկու թաղամաս:
Հալեպում իրավիճակը կտրուկ սրվել էր հունվարի 6-ին՝ կառավարական ուժերի և ՍԴՈՒ-ի միջև բախումներից հետո: Հունվարի 9-ի երեկոյան Սիրիայի պաշտպանության նախարարությունը հայտարարել էր Հալեպում հրադադարի մասին: Սակայն Հալեպի քրդական ուժերն սկզբում հրաժարվել էին լքել Շեյխ Մաքսուդ և Աշրաֆիե թաղամասերը, որից հետո Սիրիայի պաշտպանության նախարարությունը հայտարարել էր Շեյխ Մաքսուդում ռազմական գործողության մասին: Մարտերի ընթացքում քրդերը պնդում էին, որ թուրքական անօդաչու թռչող սարքերն աջակցում են Հալեպում սիրիական կառավարական ուժերին:
