ԱՄՆ-ն Ռուսաստանին հորդորել է դիտարկել Ուկրաինայում ռազմական գործողությունները դադարեցնելու հարցը, հայտարարել է ԱՄՆ պետքարտուղար Մարկո Ռուբիոն։
Նրա խոսքով՝ ամերիկյան կողմը ծրագրում է մարտի 12-ին կապ հաստատել Ռուսաստանի ներկայացուցիչների հետ։ Նախօրեին Վաշինգտոնի հետ բանակցությունների արդյունքում Կիևը համաձայնել էր 30-օրյա հրադադարի։
«Եթե Ռուսաստանի իշխանություններն ասեն՝ ոչ, մենք պետք է ուշադիր վերլուծենք իրավիճակը՝ հասկանալու համար մեր տեղն աշխարհում և Մոսկվայի իրական մտադրությունները։ Դա ցուցիչ կլինի նրանց նպատակների և մտածողության մասին»,- Պետդեպարտամենտի մամուլի ասուլիսի ընթացքում ասել է Ռուբիոն։
Պետքարտուղարն ընդգծել է, որ հակամարտությունը ռազմական լուծում չունի, և բանակցությունները դրա լուծման միակ ճանապարհն են։ Որպեսզի հակամարտությունը կրկին չսրվի, պետք է «զսպող մեխանիզմ» ստեղծել։
Ռուբիոն նաև հայտարարել էր, որ Սաուդյան Արաբիայում ընթացող բանակցություններում ԱՄՆ-ի և Ուկրաինայի պատվիրակությունները քննարկել են Կիևի կողմից հնարավոր տարածքային զիջումների հարցը։
Մարտի 11-ին Կիևը համաձայնել էր ընդունել ժամանակավոր հրադադարի մասին ԱՄՆ-ի առաջարկը: ԱՄՆ-ն վերսկսել էր հետախուզական տվյալների փոխանակումն Ուկրաինայի հետ: Վաշինգտոնն իր պատրաստակամությունն է հայտնել տարբեր խողովակներով Մոսկվային փոխանցել այս առաջարկը։ ԱՄՆ նախագահ Դոնալդ Թրամփը հայտնել էր, որ ամերիկյան պատվիրակությունը շուտով հանդիպում կունենա Ռուսաստանի ներկայացուցիչների հետ։ Իր հերթին ՌԴ նախագահի մամուլի քարտուղար Դմիտրի Պեսկովը կոչ էր արել հապճեպ եզրակացություններ չանել՝ ընդգծելով, որ Մոսկվան սպասում է բանակցային գործընթացի լրացուցիչ մանրամասներին։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ վերածվել էր վիճաբանության՝ հենց լրատվամիջոցների առջև, և գործարքը ձախողվել էր:
