Հայաստանը պատրաստ է տեղակայել ճանապարահային ենթակառուցվածքների 7 անցման կետեր Հայաստան-Ադրբեջան և Հայաստան-Թուրքիա սահմանին, ապահովել Հայաստանի, Ադրբեջանի և Թուրքիայի միջև հաղորդակցություն՝ վերականգնելով ենթակառուցվածքի 4 տարբեր հատվածներ, Դեպի ծով ելք չունեցող երկրների համաժողովում հայտարարել է Տարածքային զարգացման և ենթակառուցվածքների նախարար Գնել Սանոսյանը։
Նա նշել է, որ «Խաղաղության խաչմերուկ» ծրագրով Հայաստանը պատրաստակամություն է հայտնում կառուցել և վերակառուցել բոլոր այն ենթակառուցվածքները, որոնք կապահովեն տրանսպորտային հաղորդակցությամբ տարածաշրջանային երկրները՝ հյուսիս-հարավ և արևելք-արևմուտք ուղղություններով։
«Հյուսիս-հարավ մայրուղու կառուցումը տրանսպրոտային համակարգի զարգացման մեր առաջնահերթությունն է․ այն երկրի հարավը կկապի հյուսիսին՝ ապահովելով միջազգային ստանդարտներին համապատասխանող տրանսպորտային հաղորդակցություն հարևան երկրների հետ, էապես կկարճատվեն երթևեկության ժամանակը և տրանսպորտային ծախսերը, կապահովի տրանսպորտային կապը դեպի Սև ծով և Պարսից ծոց»,- ընդգծել է նախարարը։
Հոկտեմբերի 26-ին Նիկոլ Փաշինյանը Թբիլիսիում ներկայացրել էր ՀՀ կառավարության «Խաղաղության խաչմերուկ» նախագիծն ու դրա սկզբունքները: Նրա խոսքով՝ այդ նախագծի առանցքային իմաստը Հայաստանի, Թուրքիայի, Ադրբեջանի, Իրանի միջև կոմունիկացիաների զարգացումն է՝ ճանապարհներ, երկաթուղիներ, խողովակաշարեր, մալուխներ, էլեկտրահաղորդման գծեր նորոգելու, կառուցելու, գործարկելու միջոցով։
Մանրամասները՝ տեսանյութում։
