Հայաստանի վարչապետ Նիկոլ Փաշինյանի այցը ԱՄՆ հայտնվել է Հայաստանում քաղաքական հետապնդումների մասին աղմկահարույց սկանդալի ստվերում, գրել է The Washington Reporter պարբերականը, որը կապված է ԱՄՆ Հանրապետական կուսակցության հետ։
Պարբերականը նշել է, որ ուշադրության կենտրոնում «Տաշիր» ընկերությունների խմբի և «Հայաստանի էլեկտրական ցանցեր» ընկերության սեփականատեր Սամվել Կարապետյանն է:
Պարբերականի տվյալներով՝ իրավիճակը մտահոգություն է առաջացրել Թրամփի վարչակազմում և ԱՄՆ Կոնգրեսում։ Աղբյուրներից մեկը հայտարարել է, որ տեղի ունեցածը «քաղաքական հաշվեհարդար է հիշեցնում»։ Պարբերականը, հղում անելով սենատորների օգնականներից մեկին, գրել է, որ Վաշինգտոնը կարող է վերանայել երկկողմ հարաբերությունները, եթե Հայաստանը «գործում է ավելի շուտ որպես Խորհրդային Միություն, քան որպես ազատ երկիր»։
ՀՀ ներքին գործերի նախարարության հատուկ նշանակության ստորաբաժանումները հունիսի 17-ին խուզարկություններ էին սկսել «Տաշիր» ընկերությունների խմբի նախագահ Սամվել Կարապետյանի տանը՝ Հայ Առաքելական եկեղեցու և հոգևորականների նկատմամբ իշխանությունների գործողությունները քննադատելուց հետո։ Հունիսի 18-ից Կարապետյանը երկու ամսով կալանավորվել էր, նրան մեղադրում են իշխանությունը զավթելու կոչեր անելու համար: Կարապետյանը մեղադրանքը չի ընդունում։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
