Ֆրանսիացի դերասան Ժերար Դեպարդիեն իր հայրենիքում կասկածվում է հարկային խարդախության և փողերի լվացման մեջ, հայտնում է ՌԲԿ-ն՝ հղում անելով AFP-ին։
Գործակալությունը նշում է, որ հետաքննությունն սկսվել էր 2024 թվականի փետրվարին՝ Ֆրանսիայի ազգային ֆինանսական դատախազության կողմից։ Դերասանին կասկածում են, որ նա 2013 թվականին Բելգիան կանխամտածված նշել է որպես իր բնակության վայր՝ Ֆրանսիայում հարկային պարտավորություններից խուսափելու համար։ Փաստացի, ըստ քննիչների, դերասանն ապրել է իր հայրենիքում։
Notele հրատարակությունը գրել է, որ Դեպարդիեն 2012 թվականին Բելգիայի հարավում գտնվող Վալոնիայի Նեչեն գյուղում տուն է գնել: Այդ փաստով Ֆրանսիայի իշխանությունները 2025 թվականի փետրվարին հետաքննություն են սկսել, որը ներառում էր խուզարկություններ Փարիզում, Ֆրանսիայի Մեն-է-Լուարի դեպարտամենտում և Բելգիայում, հայտնել է AFP-ի աղբյուրը:
Notele-ը գրել է, որ վարույթը կապված է իրական բնակության վայրի մասին կեղծ տեղեկությունների հետ։ Դատարանը, ըստ հրատարակության, մի քանի անձի է ձերբակալել։
Դեպարդիեի փաստաբանը Mediapart-ին հայտնել է, որ հարկային մարմինները երկար տարիներ փորձում են պարզել բոլոր հանգամանքները։
«Այդ փորձն անհաջող էր, և հիմա փորձում են դրան հասնել քրեական հետապնդման միջոցով։ Ի դժբախտություն իրենց՝ արդյունքը նույնն է լինելու»,- ասել է փաստաբանը և վստահեցրել, որ իր պաշտպանյալը գործել է օրինական։
2013 թվականին Դեպարդիեն ստացել էր Ռուսաստանի քաղաքացիություն՝ պահպանելով ֆրանսիական անձնագիրը։ Դերասանը նման քայլի էր գնացել Ֆրանսիայում հարկային բարեփոխումների պատճառով, որով բարձրացվում էր հարկային դրույքաչափը գերհարուստների համար մինչև 75%: Հարկը, որն ստիպել է Դեպարդիեին լքել երկիրը, հետագայում համարվել է խտրական և չեղարկվել Ֆրանսիայի սահմանադրական խորհրդի կողմից:
Դեպարդիեն ներգրավված է մի քանի քրեական գործում, այդ թվում՝ սեռական ոտնձգությունների մեղադրանքով: Դերասանին նշված մեղադրանքով ձերբակալել էին 2024-ի ապրիլի 29-ին, ազատ էին արձակել ապրիլի 30-ին։ Դեպարդիեին սեռական բռնության մեջ են մեղադրում երկու կանայք։ Նրանց խոսքով՝ առաջին դեպքը տեղի էր ունեցել 2014 թվականին՝ «Մոգը և սիամացիները» ֆիլմի նկարահանումների ժամանակ, երկրորդը՝ 2021 թվականին՝ «Կանաչ փեղկեր» ֆիլմի նկարահանումների ժամանակ։ Դերասանը չի ընդունում իրեն առաջադրված բոլոր մեղադրանքները։
