Աշտարակի համայնքի Օրգով գյուղի 12-ամյա աշակերտին քաղցրավենիքի միջոցով թմրանյութ տալու գործով հանրային քրեական հետապնդում է հարուցվել 1 անձի նկատմամբ, Armenia Today-ին հայտնել են Քննչական կոմիտեից։
Նշվում է, որ դեպքի առթիվ ՀՀ քննչական կոմիտեի Արագածոտնի մարզային քննչական վարչությունում 2026 թվականի հունիսի 7-ին նախաձեռնված քրեական վարույթի նախաքննության ընթացքում մեկ անձի նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 3-րդ մասի 3-րդ կետով (թմրանյութերի ապօրինի շրջանառությունը խոշոր չափերով, առավելագույն պատիժը՝ 8 տարվա ազատազրկում)։
Ըստ ՔԿ-ի՝ նրա նկատմամբ տնային կալանքը որպես խափանման միջոց կիրառելու վերաբերյալ միջնորդություն է ներկայացվել դատարան, որը մերժվել է և որպես խափանման միջոց է կիրառվել բացակայելու արգելքը:
Գերատեսչությունից հավելել են, որ նշանակվել են փորձաքննություններ։
«Ձեռքդ տուր» համայնքային զարգացման ՀԿ նախագահ Կարինե Թորոսյանը հունիսի 6-ին ահազանգել էր, որ Օրգովի Արփի Թրպանճյանի անվան միջնակարգ դպրոցի 12-ամյա աշակերտը դպրոցական էքսկուրսիայից հետո հայտնվել էր հիվանդանոցում։ Երեխայի օրգանիզմում հայտնաբերվել էր թմրամիջոց։ Նա նշել էր, որ խոսքը բարձր դոզայի մասին է, իսկ երեխան ծանր վիճակում է և հիշողության կորուստ ունի։
