Իրավապահները բերման են ենթարկել Երևանում Հակակոռուպցիոն դատարանի շենքի մոտ ակցիա իրականացնողներին, ուղիղ հեռարձակումը՝ Armenia Today-ի Youtube-ի ալիքում։
Դատարանում քննվում է «Ուժեղ Հայաստան» կուսակցության վարչապետի թեկնածու Սամվել Կարապետյանի տնային կալանքի խափանման միջոցը փոխելու հարցը։ Նրա աջակիցները «Երազ» զբոսայգուց երթ էին սկսել դեպի Հակակոռուպցիոն դատարան՝ պահանջելով ազատ արձակել Կարապետյանին։
Armenia Today-ին Ներքին գործերի նախարարությունից տեղեկացրել են, որ այս պահի դրությամբ դատարանի մոտից ոստիկանության տարբեր բաժիններ բերման է ենթարկվել ակցիայի 17 մասնակից։
Ըստ ՆԳՆ տվյալների՝ նրանք մեղադրվում են Վարչական իրավախախտումների վերաբերյալ ՀՀ օրենսգրքի 182-րդ հոդվածով նախատեսված արարքի մեջ․ այն է՝ ոստիկանության ծառայողի օրինական պահանջին չենթարկվելը։
Ոստիկանությունն գործողություններ է սկսել բողոքի ակցիայի մասնակիցների դեմ, երբ ուժայիններն առաջ են շարժվել դեպի մասնակիցները՝ նրանց Թբիլիսյան խճուղու երթևեկելի գոտուց դուրս մղելով դեպի մայթ։
Ինչպես դեպքի վայրից հայտնել է Armenia Today-ի թղթակիցը, ոստիկանության գործողությունների պատճառը երթևեկության դժվարացումն էր։ Ըստ նրա՝ մասնակիցների թվի ավելացումից հետո մարդիկ կանգնած էին երթևեկելի գոտում, ինչը խոչընդոտել է տրանսպորտի շարժը։
Ոստիկանության աշխատակիցները, շարք կազմած, սկսել են առաջ շարժվել՝ ստիպելով մասնակիցներին նահանջել երթևեկելի մասից։ Ակցիայի կազմակերպիչները, այդ թվում՝ կուսակցության խորհրդի անդամ Նարեկ Կարապետյանը և, ենթադրաբար, կուսակցության անդամ Ալիկ Ալեքսանյանը կոչ են արել մասնակիցներին չտրվել «մանր սադրանքների»։
Թղթակցի փոխանցմամբ՝ տեղում արձանագրվել են առանձին կարճատև բախումներ։
ՄԻՊ ներկայացուցիչներն արագ արձագանքման այց են իրականացրել ոստիկանության բաժիններ՝ տեսակցելու բերման ենթարկվածներին։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։ Նրա գործով դատավարությունը մեկնարկել էր ապրիլի 15-ին։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ: Դատարանը մարտի 14-ին ևս մեկ ամսով երկարաձգել էր նրա տնային կալանքը: «Ուժեղ Հայաստանն» ավելի ուշ հրապարակել էր ընտրություններին մասնակցող առաջին 36 թեկնածուի անունները։
Թարմացված է՝ 17.04.2026 | 18:10
