Հայաստանը թվային զարգացումը համարում է կայուն աճի հիմնական ուղղություններից մեկը, հայտարարել է վարչապետ Նիկոլ Փաշինյանը՝ հեռավար ելույթ ունենալով Մինսկում անցկացվող Եվրասիական տնտեսական ֆորումին:
«Հայաստանը մեծ նշանակություն է տալիս թվային օրակարգի մասնակցությանը՝ թվային փոխակերպումը դիտարկելով որպես խոչընդոտների վերացման և փոխադարձ առևտրում թափանցիկության բարձրացման գործիք»,- նշել է Փաշինյանը։
Նա համոզմունք է հայտնել, որ հենց թվայնացումն է նոր հնարավորություններ բացում տնտեսությունում, պետական կառավարման համակարգում և սոցիալական ոլորտում։
Նրա խոսքով՝ այսօր Հայաստանն առաջարկում է բարդ կոմպլեքսային տեխնոլոգիական լուծումներ ու ծառայություններ։
«Հայաստանում ընթանում են համակարգված աշխատանքներ թվայնացման ուղղությամբ, կատարելագործվում են էլեկտրոնային կառավարման համակարգերը, բարձրանում է քաղաքացիների թվային գրագիտությունը, մշակվում են ժամանակակից կիբերանվտանգության մեխանիզմներ»,- ասել է նա։
Փաշինյանի խոսքով՝ NVIDIA-ի կողմից Հայաստանում հետազոտական կենտրոն բացելու որոշումը հաստատում է, որ նույնիսկ փոքր երկրները, որոնք ունեն հավակնություններ և տեխնիկական հասունություն, կարող են նշանակալի դեր խաղալ համաշխարհային տեխնոլոգիական էկոհամակարգում։
Վարչապետը շեշտել է, որ Հայաստանն առանձնահատուկ կարևորություն է տալիս մաքսային ոլորտի թվայնացմանը՝ որպես վստահության տարածք ստեղծելու հիմք։
Ըստ նրա՝ Հայաստանի համար, որը չունի ընդհանուր սահմաններ ԵԱՏՄ մյուս երկրների հետ, մաքսային, լոգիստիկ և սահմանային ենթակառուցվածքների արդիականացումը դառնում է հատկապես արդիական։
«Մենք բաց ենք անդրսահմանային հարթակների և փորձարարական նախագծերի մշակման համար, որոնք թույլ կտան մեզ բոլորիս ոչ միայն ներդնել առկա տեխնոլոգիաները, այլև մշակել մեր սեփական հետաքրքիր և արդյունավետ լուծումները»,- հավելել է Փաշինյանը։
Այսօր ավելի վաղ կառավարությունից Armenia Today-ին հայտնել էին, որ Փաշինյանը տեսակապով կմասնակցի Եվրասիական տնտեսական բարձրագույն խորհրդի նիստին։
Բելառուսի նախագահ Ալեքսանդր Լուկաշենկոն 2024 թվականի դեկտեմբերին ԵԱՏՄ գագաթնաժողովի ժամանակ Փաշինյանին զգուշացրել էր Մինսկում կայանալիք միության հանդիպմանն առցանց մասնակցելու ռիսկերի մասին։ Փաշինյանի և Լուկաշենկոյի միջև բանավոր վեճ էր տեղի ունեցել, երբ ՀՀ վարչապետն ասել էր, որ հայկական պատվիրակությունը հեռակա կարգով կմասնակցի այդ նիստին։ Լուկաշենկոն խոստացել էր քննարկել նրա հայտարարությունը, ինչին Փաշինյանը պատասխանել է, որ դա ոչ թե պետք է դիտարկել, այլ հաշվի առնել։
Փաշինյանը 2024 թվականի հունիսին պահանջել էր Բելառուսի նախագահից ներողություն խնդրել՝ Ադրբեջանին 2020 թվականի 44-օրյա պատերազմի ժամանակ աջակցելու համար։ Փաշինյանն ասել էր, որ ինքը «երբեք չի գնա Բելառուս», քանի դեռ Լուկաշենկոն նախագահ է։ Նույն օրը ՀՀ-ն խորհրդակցությունների նպատակով հրավիրել էր Բելառուսում Հայաստանի դեսպանին: Բելառուսը նույնպես հետ էր կանչել Հայաստանում իր դեսպանին՝ խորհրդակցությունների համար։
