Իսրայելի քաղաքացի Սիմոն Լևաևը (իսկական անունը՝ Շիմոն Չայու), որն առավել հայտնի է որպես «Tinder խաբեբա», ձերբակալվել է Վրաստանի Բաթումիի օդանավակայանում, հայտնել է The Jerusalem Post-ը:
Նրա փաստաբանի խոսքով՝ ձերբակալությունից հետո առավոտյան նրանց հաջողվել է խոսել Լևաևի հետ, սակայն ձերբակալման պատճառները դեռևս պարզ չեն: Նա «ազատորեն ճանապարհորդել է» ամբողջ աշխարհով մեկ, հավելել է փաստաբանը:
Կալանավորման փաստը վրացական «Ռուսթավի 2» հեռուստաալիքին հաստատել է երկրի Ներքին գործերի նախարարությունը: Հեռուստաալիքի տվյալներով՝ Լևաևը միջազգային հետախուզման մեջ էր Ինտերպոլի կողմից:
Նա լայն ճանաչում էր ձեռք բերել 2022 թվականին Netflix-ում «Tinder խաբեբա» վավերագրական ֆիլմի թողարկումից հետո: Այն պատմում էր, թե ինչպես է նա Tinder ծանոթությունների հավելվածի միջոցով հանդիպել կանանց, ներկայացել որպես հարուստ գործարար և նրանցից մեծ գումարներ շորթել՝ այդ գումարը ծախսելով ուրիշներին սիրահետելու վրա: Նա ներկայացել է որպես իսրայելցի միլիարդատեր և ադամանդի մագնատ Լև Լևաևի որդին և իր էջը զարդարել մասնավոր ինքնաթիռների և զբոսանավերի լուսանկարներով: Ֆիլմի ստեղծողները նրա գործողություններից պատճառված վնասը գնահատել էին մոտ 10 միլիոն դոլար:
2019 թվականին Լևաևը ձերբակալվել էր Հունաստանում՝ կեղծ փաստաթղթեր օգտագործելու համար, որից հետո արտահանձնվել էր Իսրայելին և դատապարտվել 15 ամսվա ազատազրկման խարդախության համար: Հինգ ամիս անց նա վաղաժամկետ ազատ էր արձակվել համավարակի դեմ պայքարի ծրագրի շրջանակներում։
2024 թվականին Թել Ավիվի դատարանը նրան պարտավորեցրել էր ավելի քան 100 հազար եվրո փոխհատուցում վճարել իսրայելցի Քեյթ Քոնլինին, որը պնդում էր, որ Լևաևը իրեն բարոյական և ֆիզիկական վնաս է պատճառել, ինչպես նաև ստիպել էր նրան վարկեր վերցնել, որոնք նա չի մարել։
