Մեր եկեղեցիները «չուլանացված են», ՀՀ կառավարության մայիսի 29-ի նիստին ասել էր Հայաստանի վարչապետ Նիկոլ Փաշինյանը: Ըստ նրա՝ մարզահամերգային համալիրում հարսանիք կազմակերպելու հարցը քննադատելու փոխարեն հարկավոր է այս մասին մտածել: Վարչապետը վերջերս եկեղեցիներ է գնացել ու այնտեղ տեսել անպետք իրեր, նույնիսկ՝ աղբ:
Հայ Առաքելական եկեղեցու ներկայացուցիչներից ոմանք սուր են արձագանքել այս հայտարարությանը՝ ասելով, որ նման կերպ Փաշինյանը վիրավորում է յուրաքանչյուր հավատացյալի:
Armenia Today-ի նկարահանող խումբը հայաստանցիներից հետաքրքրվել է, թե վարչապետին հարի՞ր է նման արտահայտություն անելը, ի՞նչ վիճակում են եկեղեցիները, ի՞նչ պետք է անեն կառավարությունն ու եկեղեցին դրանց բարելավման համար:
Հարցմանը մասնակցած քաղաքացիների կարծիքները գրեթե հավասարապես կիսվում էին:
Ոմանք խստորեն քննադատել են վարչապետի նման արտահայտությունները:
«Ամեն մարդ իր մակարդակին է խոսում: Ինքը շատ վատ պատասխան է տվել: Եկեղեցին ոնց մշտական եղել է, տենց էլ շարունակում է։ Լավ լինելու դեպքում պետք է ինքը ֆինանսավորի, որ ամեն բան տեղն ընկնի»,- ասել է քաղաքացիներից մեկը։
«Այդ մարդու հայացքները լրիվ հակահայկական են։ Իսկ եկեղեցին մեր պատմությունն է, եկեղեցին հնություն է չէ՞, պիտի այդպես էլ պահպանվի։ Ինձ համար ինչը որ հայկական է, սրբություն է։ Ես դրանց պղծելն էլ չեմ ընդունում»,- հավելել է մյուսը։
Կային նաև քաղաքացիներ, որոնք համամիտ էին, որ եկեղեցիներն իսկապես վատ և անխնամ վիճակում են գտնվում:
«Ինքը միայն նկատի ուներ, որ եկեղեցիներում աղբ են թափում։ Ուղղակի ասում է՝ մի՛ կեղտոտեք, մաքուր պահեք, ինչպես քաղաքն, այնպես էլ եկեղեցին»,- նշել է հարցման մեկ այլ մասնակից։
«Նկատի ուներ, որ բարեկարգված չէ, ու ոչ մի բան նորմալ տեղերում դրված չէ։ Մտնում ես՝ տհաճ է ուղղակի, ինձ համար էլ է տհաճ։ Իրենք իրենց լավ էլ ֆինանսավորում են»,- ասել է քաղաքացիներից մեկը։
Մանրամասները՝ Armenia Today-ի տեսանյութում
