ԶԼՄ-ները ՆԳՆ ոստիկանության պետ Արամ Հովհաննիսյանի պաշտոնանկության մի քանի պատճառ են նշել։
«Հրապարակ» օրաթերթը, հղում անելով իր աղբյուրներին, գրել է, որ իշխանական շրջանակներում Հովհաննիսյանի պաշտոնանկությունը կապում են ՀՀ վարչապետ Նիկոլ Փաշինյանի ծննդյան օրվա հետ։
Ըստ թերթի՝ ոստիկանապետը հունիսի 1-ին պատշաճ չի կազմակերպել միջպետական մայրուղու Սևանի ճանապարհը փակելու գործը:
Փաշինյանի 50-ամյակը նշել են Սևանի կառավարական ամառանոցում: Ըստ թերթի՝ ոստիկանապետը մեծ ջանք է գործադրել ճանապարհը շուտ փակելու հարցում, իսկ երբ Փաշինյանն անցել է ավտոշարասյունով, սպասող վարորդները տևական ազդանշաններ են արձակել։ Թերթը նշել է, որ բացի այս միջադեպը, Երևանը ողողված էր «Շնորհավոր, քեռի Նիկոլ» և «Չենք վստահում» մակագրությամբ պաստառներով:
Հովհաննիսյանը Փաշինյանի տարեդարձի առաջինը հեռացող հյուրերից էր, քանի որ Փաշինյանը հենց այնտեղ է ասել` դիմումդ գրի, պատմել է թերթը։
«Ժողովուրդ» օրաթերթի աղբյուրն, իր հերթին, Հովհաննիսյանի հեռանալը կապել է Ներքին գործերի նորանշանակ նախարար Արփինե Սարգսյանի հետ լարված հարաբերությունների հետ։
«Երկու պաշտոնյաների համագործակցությունը երբեք չի եղել ներդաշնակ, սակայն, ինչպես երևում է, վերջերս այդ լարվածությունը հասել է իր գագաթնակետին»,- շեշտել է թերթը։
Փաշինյանի՝ 2024թ. դեկտեմբերի 10-ի որոշմամբ՝ Հովհաննիսյանը վերանշանակվել էր ՆԳՆ ոստիկանության պետ-Ներքին գործերի նախարարի տեղակալ։ ՀՀ ոստիկանապետ էր նշանակվել Լոռու մարզպետ Արամ Ղազարյանը։
