ՀՀ իշխանությունները հրաժարվում են օգտագործել այն գործիքակազմերը, որոնք կարող են օգնել Ադրբեջանում պահվող հայ գերիներին վերադարձնելու հարցում, Armenia Today-ին հայտնել է հացադուլի մեջ գտնվող, «Ապրելու երկիր» կուսակցության համահիմնադիր Մանե Թանդիլյանը։
«Այս մարդիկ հրաժարվում են գործիքակազմերից, որոնցով կարող են հետ ստանալ գերիներին։ ԵԱՀԿ Մինսկի խումբ եք լուծարում, իսկ դրա դիմաց ի՞նչ եք ստացել»,- հարցրել է Թանդիլյանը։
Որպես անհրաժեշտ միջոցներ՝ նա նշել է Արցախի նախկին պետնախարար Ռուբեն Վարդանյանի փաստաբան Ջարեդ Գենսերի կողմից հրապարակված քայլերի ցանկը։ Նրա խոսքով՝ Հայաստանում բավարար գործողություններ չեն ձեռնարկվել հայ գերիներին վերադարձնելու համար։ Թանդիլյանն ընդգծել է, որ այս հարցը պետք է լիներ բոլորի օրակարգում։ Նա շեշտել է, որ հայկական պետությունը պետք է առաջնորդի գերիների վերադարձի հարցը։
Թանդիլյանը հույս է հայտնել, որ Բաքվի բանտում գտնվող Վարդանյանը տեղեկատվական շրջափակման մեջ չէ և կիմանա իր քայլի մասին։ Թանդիլյանի խոսքով՝ չի կարող պնդել, որ այս տեղեկությունը հասել է Վարդանյանին։
«Բայց Վարդանյանն ինչ-որ միջոցով, ինչ-որ մի պահի կիմանա։ Հուսով ենք, որ ինֆորմացիոն բլոկադայի չի ենթարկվի, ինչպես նախորդ հացադուլի ժամանակ էր»,- ասել է նա։
Միևնույն ժամանակ, Թանդիլյանը վստահ չէ, որ իր հացադուլի մասին տեղեկությունը կազդի Վարդանյանի որոշումների վրա, քանի որ վերջինս հացադուլ անելու պատճառներ ունի։ Նրա խոսքով՝ Արցախի նախկին պետնախարարն այսպիսով պայքարում է այն խնդիրները բարձրացնելու համար, որոնց բախվում են Ադրբեջանում պահվող բոլոր հայ գերիները։
«Նա պայքարում է նաև այդ միջոցով։ Բայց այդ միջոցը ճիչ է, որպեսզի բարձրաձայնվեն այն խնդիրները, ինչին առնչվում են ոչ միայն ինքը, այլև մեր մյուս բոլոր գերիները։ Նա այդ միջոցով խոսում է մեզ հետ»,- ընդգծել է Թանդիլյանը։
Պատասխանելով հացադուլի հնարավոր տևողության մասին հարցին՝ նա պարզաբանել է, որ ակցիան դադարեցնելու վերջնաժամկետը Վարդանյանի հացադուլը դադարեցնելու ժամկետն է։
«Վարդանյանը շատ ավելի վաղուց է սկսել հացադուլը, ինչը նշանակում է՝ իր համար արդեն անդառնալիության կետին հասել է, և ամեն մեկ օրը նրա համար կարող է մահացու լինել։ Այս հացադուլն իմ մասին չէ։ Այս հացադուլն այն մասին է, որ բոլորս Ռուբենի կարիքն ունենք»,- ընդգծել է Թանդիլյանը։
Անդրադառնալով 2026 թվականի խորհրդարանական ընտրություններին իր հնարավոր մասնակցությանը՝ Թանդիլյանը նշել է, որ 2023 թվականից սկսած՝ իր «անձնական և մարդկային օրակարգը գերիների վերադարձն է»։
«Ո՛չ տրանսպորտը, ո՛չ հայտարարագիրը, ո՛չ մի ուրիշ բան ինձ չեն հետաքրքրում։ Ես ամաչում եմ, որ այնտեղ հայորդիները դատվում են»,- հավելել է նա։
Թանդիլյանը մարտի 1-ից հացադուլ էր հայտարարել՝ ի աջակցություն Բաքվում պահվող Վարդանյանի և մյուս հայ գերիների: Մարտի 5-ին «Ապրելու երկիր» կուսակցության համահիմնադիր Մեսրոպ Առաքելյանն Armenia Today-ին հայտնել էր, որ Թանդիլյանը շտապօգնության մեքենայով տեղափոխվել է հիվանդանոց, ավելի ուշ նա վերադարձել էր Ազատության հրապարակ։ Թանդիլյանին միացել էին Վարդան Ավագյանը, Արտավազդ Արարատյանը և Արտակ Չիբուխչյանը։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին Բաքվում սկսվել էին Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
Փետրվարի 19-ին նախկին պետնախարարը հացադուլ էր հայտարարել և դիմել աշխարհի առաջնորդներին, միջազգային կազմակերպություններին և իրավապաշտպաններին՝ հորդորելով ուշադրություն դարձնել Բաքվում տեղի ունեցող անօրինական գործընթացներին։
Փետրվարի 26-ին Վարդանյանի փաստաբան Ջարեդ Գենսերը հայտնել էր նրա առողջական վիճակի կտրուկ վատթարացման մասին։
Մարտի 5-ին կայացած ԱԺ-կառավարություն հարցուպատասխանի ժամանակ Փաշինյանը հայտարարել էր, որ խաղաղության պայմանագրի ուղղությամբ գործադրվող ջանքերը մեկն են այն գործողություններից, որը նպաստ կբերի գերիների և մյուս հարցերի լուծմանը։
Մանրամասները՝ տեսանյութում։
