Կառավարությունը փետրվարի 27-ի նիստում հավանություն է տվել կրիպտոարժույթի ոլորտը կարգավորող օրինագծին, որով Հայաստանում կրիպտոարժույթին առնչվող ծառայություններ կկարողանան մատուցել միայն այն իրավաբանական անձինք, որոնք ՀՀ կենտրոնական բանկի կողմից համապատասխան լիցենզիա կստանան։
Ֆինանսների նախարար Վահե Հովհաննիսյանը հայտնել է, որ ոլորտում կարգավորման դաշտի բացակայության հետևանքով առաջանում են իրավական խնդիրներ՝ կապված կրիպտոակտիվներով ծառայություններ մատուցողների, պետական մարմինների հետ առնչվելու և հաճախորդների շահերի պաշտպանության հետ։ Նրա խոսքով՝ հաճախորդների շահերի պաշտպանության բավարար մեխանիզմներ չկան, իսկ նոր նախագծով՝ հաճախորդները խնդիրների դեպքում կարող են դիմել ֆինանսական հաշտարարին:
«Մասնավորապես, հաճախորդների շահերի անբավարար պաշտպանվածությունը թույլ չի տալիս ներգրավել մեծ թվով հաճախորդներ և նրանց հասանելի դարձնել բարձրորակ ծառայություններ, իսկ փողերի լվացման ու ահաբեկչության ֆինանսավորման ռիսկերը սահմանափակում են կրիպտոէկոհամակարգի և ֆինանսական համակարգի փոխշահավետ համագործակցության հնարավորությունները։ Հրատապ անհրաժեշտություն է առաջացել ներդնել կրիպտոակտիվների ոլորտի համապարփակ կարգավորման մոդել, որը հնարավորություն կտա ստեղծել ոլորտի անխափան զարգացման համար անհրաժեշտ նախապայմաններ՝ միաժամանակ նվազեցնելով առկա և հնարավոր ռիսկերի բացասական հետևանքները»,- հստակեցրել է նախարարը։
Նախագծի ընդունման դեպքում, ըստ Հովհաննիսյանի, կրիպտոէկոհամակարգի ոլորտում կձևավորվի կանխատեսելի միջավայր՝ գործունեություն ծավալող անձանց հստակ սահմանված իրավունքներով և պարտականություններով, հաճախորդների շահերի պաշտպանության բավարար մեխանիզմներով։
«Ոլորտում գործունեություն ծավալողների համար խաղի հստակ կանոններ կսահմանվեն։ ՀՀ կենտրոնական բանկը հնարավորություն կունենա ստանալ անհրաժեշտ տեղեկատվություն ոլորտում իրականացվող գործունեության վերաբերյալ և կկարողանա պատշաճ կերպով արձագանքել ֆինանսական կայունությանը, փողերի լվացման և ահաբեկչության ֆինանսավորման ռիսկերին։ Այդպիսով՝ ԿԲ-ն կկարողանա համագործակցել այլ երկրների կարգավորող և վերահսկող մարմինների և միջազգային կազմակերպությունների հետ»,- հավելել է Հովհաննիսյանը։
Վարչապետ Նիկոլ Փաշինյանը նշել է, որ նախագիծն ուշացած է, քանի որ այն վաղուց էր անհրաժեշտ։
«Մայրաքաղաքում տեղեր կան, փողոցում քայլելիս՝ մարդիկ ասում են՝ կրիպտոարժույթ ունե՞ք, 4 հատ տվեք, ինչ աբսուրդ է։ Տեխնոլոգիաներ անվան տակ ինչ-որ գործողություններ ենք անում, որ բացարձակապես անընդունելի է։ Եթե կառավարության քաղաքական կամքը չլինի, մեկը չի ասի՝ ընկերներ, բայց սա ի՞նչ վիճակ է։ Եվ եթե չեն գալիս ու չեն ասում, ուրեմն՝ մի բան այն չէ։ Պարզվում է՝ մեր երկրում իրենք ոչ թե ինչ-որ դաշտում, այլ մայթում են գործում»,- նշել է նա։
ԿԲ նախագահ Մարտին Գալստյանն էլ հավելել է, որ ԿԲ-ն ծառայություններ մատուցող անձանց համար մուտքի պահանջներ է սահմանելու, որոնք բխում են քաղաքացիների կամ ներդրողների շահերից։ Նա տեղեկացրել է, որ ԿԲ-ն նախագծի ընդունման արդյունքում կտեսնի, թե ովքեր են ծառայություններ մատուցողների ղեկավարները, սեփականատերերը։
2024-ի հոկտեմբերին Ազգային ժողովի պետաիրավական հարցերի հանձնաժողովը երկրորդ ընթերցմամբ հավանություն էր տվել երկրում կիբերհանցագործության դեմ պայքարի մասին օրենքում կրիպտոարժույթների հետ կապված գործունեության վերահսկողության վերաբերյալ փոփոխություններին։ Մեկնաբանելով օրինագիծը՝ «Քաղաքացիական պայմանագիր» խմբակցության քարտուղար Արթուր Հովհաննիսյանն Armenia Today-ին ասել էր, որ կասկածելի գործարքներն իրականացվում են հենց կրիպտոարժույթներով։
