Սաուդյան Արաբիայի արքայազնը հայտարարել է ՀՀ-ում սոցիալական զարգացման ծրագրի ֆինանսավորման մասին

Սաուդյան Արաբիայի արքայազն Աբդուլ Ազիզ բին Թալալը հայտարարել է Հայաստանում սոցիալական զարգացման ծրագրերը ֆինանսավորելու որոշման մասին, հայտնել է աշխատանքի և սոցիալական հարցերի նախարարությունը։

Արքայազն Աբդուլ Ազիզը Հայաստանի աշխատանքի և սոցիալական հարցերի նախարար Նարեկ Մկրտչյանի հետ հանդիպման ժամանակ հայտարարել է, որ Պարսից ծոցի տարածաշրջանային զարգացման հիմնադրամի հոգաբարձուների խորհուրդը հաստատել է Հայաստանում կանանց տնտեսական հզորացմանն ուղղված ծրագրերի ֆինանսավորման որոշումը։

Նախաձեռնությունը կսկսի կրթական ծրագրեր գյուղաբնակ կանանց, Արցախից բռնի տեղահանված կանանց, հաշմանդամություն ունեցող անձանց և այլ թիրախային խմբերի համար՝ ներառյալ կարողությունների զարգացումը և զբաղվածության նախապատրաստումը:

Արքայազն Աբդուլ Ազիզը նախարարին տեղեկացրել է, որ այս նախաձեռնությունը կիրականացվի ՄԱԿ-ի Բնակչության հիմնադրամի և Հայաստանի աշխատանքի և սոցիալական հարցերի նախարարության միջոցով։

Մկրտչյանն ավելի ուշ ասել է, որ ծրագիրը երկարաժամկետ կլինի և կընդլայնվի՝ ներառելով այլ ոլորտներ: Կանանց տնտեսական հզորացման նախաձեռնությունը Հայաստանում կլինի սոցիալական զարգացման լայնածավալ ծրագրի առաջին փուլը երկրում։