«TOON EXPO» անշարժ գույքի և կառուցապատման ոլորտի միջազգային երկրորդ ցուցահանդեսը մարտի 31-ից ապրիլի 2-ը Կարեն Դեմիրճյանի անվան մարզահամերգային համալիրում մեկ հարկի տակ էր համախմբել ավելի քան 100 հայկական և արտասահմանյան ընկերությունների․ Հայաստանից, Ռուսաստանից, Վրաստանից, Գերմանիայից և այլ երկրներից կառուցապատողներ, ինչպես նաև անշարժ գույքի գործակալություններ, դիզայներական և ճարտարապետական ընկերություններ, արևային էներգիայի մատակարարներ, մասնագիտացված խանութ-սրահներ, ոլորտային արտադրողներ և ներմուծողներ, ինչպես նաև բանկեր։
Ցուցահանդեսի կազմակերպիչը «Big Projects»-ն է, գլխավոր հովանավորները՝ ոլորտի առաջատարներ «RED Invest Group», «Defanse Housing» և «ASEDL» ընկերությունները։
Armenia Today-ի հետ զրույցում «Big Projects» ընկերության հանրային կապերի պատասխանատու Դիանա Հարոյանը պատմեց ցուցահանդեսի առավելությունների մասին։ Նրա խոսքով՝ 2022-ի համեմատ այս տարի ցուցահանդեսն ավելի մասշտաբային է։
«Ցուցահանդեսը երկրորդ անգամ ենք կազմակերպում։ Նախորդ տարի աննախադեպ արդյունքներ ենք ունեցել՝ երեք օրում վաճառելով ավելի քան 1000 բնակարան։ Այս տարի ցուցահանդեսն աննախադեպ է իր մասշտաբով։ Բացի այդ, ցուցահանդեսը քաղաքացիներին հնարավորություն է տալիս ընդամենը մեկ մուտքով ու մեկ տանիքի տակ ծանոթանալ ավելի քան 100 ոլորտային ընկերությունների, որոնց ծանոթանալու համար նույն քաղաքացին ամիսներ պետք է ծախսեր»,- նշեց Հարոյանը։
Կազմակերպիչների խոսքով՝ ցուցահանդեսի նկատմամբ քաղաքացիների և ընկերությունների հետաքրքրությունը ևս մեծացել է։
««TOON EXPO»-ն մեկ տարում իսկապես բրենդ դարձավ։ Երևի չկա մեկը, որը տուն է փնտրում ու տեղյակ չէ, որ նմանատիպ ցուցահանդես կա։ Այս իմաստով ավելի քան հաջողված է ցուցահանդեսը»,- հավելեց նա։
Նշվածը հաստատում են նաև «TOON EXPO 2023»-ի մասնակիցները։
«Այս տարի «TOON EXPO»-ն շատ հաջողված է, մարդկանց հետարքրքությունը՝ մեծ»,- Armenia Today-ի հետ զրույցում ասաց «New city projects» կառուցապատող ընկերության վաճառքի ղեկավար Ռուբեն Բաղրամյանը։
«Defence Housing» ընկերության մարքեթինգի տնօրեն Մարինա Բաբախանյանի խոսքով, ի տարբերություն նախորդ տարվա, բնակարաններ ձեռք բերողներն ու ցուցահանդեսով հետաքրքրվողներն այս տարի ավելի են շատացել և ավելի մեծ աշխուժություն կա։
«Սա մի հարթակ է, որտեղ մեր հասարակությունը կարող է ձեռք բերել բնակարան, տեսնել շուկայի բոլոր առաջարկները, համեմատել գներն ու տեղում արդեն ամրագրում կատարել»,- ասաց Մարինա Բաբախանյանը։
Խոսելով անշարժ գույքի շուկայի միտումների մասին՝ «RED Invest Group»-ի բիզնեսի զարգացման տնօրեն Հովհաննես Բասենցյանը նշեց վերջին մեկ տարվա փոփոխությունների մասին՝ ընդգծելով նաև, թե այս ընթացքում գները որքանով են ավելացել։
«Վերջին մեկ տարում անշարժ գույքի շուկան բավականին աշխուժացել է, ինչի հետևանքով գները բարձրացել են։ Մեր ուսումնասիրություններով՝ գները մեկ տարվա ընթացքում մոտավորապես 10 տոկոսով են բարձրացել»,- ասաց նա՝ իրավիճակը հիմնականում պայմանավորելով այն հանգամանքի հետ, որ շուտով եկամտահարկի վերադարձի ծրագիրն այլևս չի գործելու։
«Այն մարդիկ, ովքեր ունեն եկամտահարկ ու գիտեն, որ 2025-ից հետո այդ արտոնությունից չեն կարող օգտվել, արդեն հիմա փորձում են գծել տուն ձեռք բերելու հնարավորությունները, սխեման»,- հավելեց նա։
Ցուցահանդեսի վերջին օրը՝ ապրիլի 2-ին, մասնակիցներին հաճելի անակնկալներ էին սպասվում։ Խաղարկությունների արդյունքում տասը հազար քաղաքացիներից 72-ը շահեցին տարբեր մրցանակներ, որոնց թվում էին բնակարան գնելու վաուչերներ՝ 5000 դոլար արժողությամբ, ինչպես նաև 100 հազար դրամ արժողությամբ նվեր քարտեր, որոնցով նրանք կարող են միանվագ օգտվել դիզայներական ընկերությունների ծառայություններից, ձեռք բերել նաև շինանյութ, շինտեխնիկա, կահույք։
Կազմակերպիչները համոզված են, որ 3 օր տևած ցուցահանդեսը, որն ավելի քան 30 հազար այցելու է ունեցել, յուրօրինակ և փոխշահավետ հարթակ է թե՛ բնակարան փնտրողների, թե՛ նաև տարբեր առաջարկներ ունեցող ոլորտի ներկայացուցիչների համար։
Աննա Բադալյան
