Հայաստանում ԱՄՆ նորանշանակ դեսպան Քրիստինա Քուինը Facebook-ում ԱՄՆ դեսպանատան հրապարակած տեսանյութում պատմել է իր հայրենի Կալիֆորնիա հայաբնակ նահանգի, Հարավային Կովկասում կայուն խաղաղության հաստատման և հայ-ամերիկյան հարաբերությունների ամրապնդման ջանքերին աջակցելու պատրաստակամության մասին:
«Ես մեծացել եմ Ֆրեզնոյում, որտեղ ունեցել եմ ուսուցիչներ և ամերիկահայ ընկերներ։ Հնարավորություն ունեցա ծանոթանալու հայկական գեղագիտական մշակույթին և խոհանոցին։ Եվ հիմա, գալով Հայաստան, կարծես տուն եմ վերադարձել», – նշել է Քուինը։
Ամերիկացի դիվանագետի խոսքով՝ դեռ մանուկ հասակում իմացել է հայ ժողովրդի պատմության ողբերգական էջերի՝ Հայոց ցեղասպանության մասին և Երևան ժամանելուց անմիջապես հետո այցելել է Ծիծեռնակաբերդ՝ հարգանքի տուրք մատուցելու Ցեղասպանության անմեղ զոհերի հիշատակին։
«Ես ծանոթ եմ Հայաստանի հարուստ բազմադարյա պատմությանը, մշակութային ժառանգությանը և հիացած եմ հայ ժողովրդի անհավանական տոկունությամբ։ Ես գիտեմ, որ վերջին տարիները լի էին մարտահրավերներով։ Արդեն հնարավորություն եմ ունեցել անձամբ լսել տեղահանված անձանց առջև ծառացած դժվարությունների մասին։ Խոստանում եմ անել հնարավորը Հայաստանի և Ադրբեջանի միջև հակամարտության երկարատև լուծման և հայ-թուրքական հարաբերությունների կարգավորման համար», – նշել է նա։
Դեսպանը վստահություն է հայտնել, որ Հայաստանն արժանի է ապրելու խաղաղության և անվտանգության պայմաններում և հետևելու իր ընտրած քաղաքական և տնտեսական ուղուն: «Հայ-ամերիկյան հարաբերություններն ամուր են, և ես ջանք չեմ խնայի ամրապնդելու մեր կապերը և օգնելու Հայաստանին պայծառ ու բարեկեցիկ ապագա կերտելու գործում», – եզրափակել է Քուինը:
ԱՄՆ Սենատը 2022 թվականի դեկտեմբերի 13-ին հավանություն է տվել Հայաստանում ԱՄՆ դեսպանի պաշտոնում Քուինի թեկնածությանը։ Մինչ այդ Հայաստանում ԱՄՆ դեսպանի պաշտոնը զբաղեցնում էր Լին Թրեյսին, որի թեկնածությունը 2022 թվականի սեպտեմբերի 22-ին Սենատի կողմից հավանության էր արժանացել Ռուսաստանում ԱՄՆ դեսպանի պաշտոնում։
