«Հարավկովկասյան երկաթուղի» ընկերությունը եվրոպացի զբոսաշրջիկների համար կազմակերպում է երկրորդ երկաթուղային զբոսաշրջային ուղևորությունը, որը կանցկացվի հուլիսի 4-12-ը։
Ընկերության հաղորդմամբ՝ շուրջ 200 զբոսաշրջիկ, հիմնականում՝ Չեխիայից, կուղևորվեն Երևան-Վանաձոր-Այրում-Թբիլիսի-Բաթումի-Երևան երթուղով։
Ութօրյա շրջագայության ընթացքում մասնակիցները կապրեն ՀԿԵ-ի նոր և ժամանակակից վագոններում, կայցելեն զբոսաշրջային տեսարժան վայրեր և հնարավորություն կունենան ծանոթանալու Հայաստանի ու Վրաստանի պատմամշակութային ժառանգությանը՝ ինչպես երկաթուղային ճանապարհորդության, այնպես էլ էքսկուրսիաների միջոցով։
Նշվում է, որ նմանատիպ առաջին զբոսաշրջային ուղևորությունը կազմակերպվել էր 2025 թվականին՝ «Հարավկովկասյան երկաթուղի» ընկերության և չեխական «Գեպարդ Էքսպրես» ընկերության համագործակցությամբ։ Այն արժանացել էր դրական արձագանքների, ինչի արդյունքում ՀԿԵ-ն ներկայումս դիտարկում է նաև այլ ընկերություններից ստացված համագործակցության առաջարկները։
