Թուրքիայի նախագահ Ռեջեփ Թայիփ Էրդողանն արձագանքել է Իսրայելի կառավարության կողմից 1915 թվականի Հայոց ցեղասպանությունը ճանաչող բանաձևի հաստատմանը։
«Մենք լիովին մերժում ենք մեր երկրի դեմ ուղղված զրպարտությունն այն հանցավոր ցանցի կողմից, որի ձեռքերը ներկված են Գազայի 75 000 անմեղ բնակիչների, հիմնականում՝ երեխաների և կանանց արյունով»,- թուրքական լրատվամիջոցները մեջբերել են Էրդողանի խոսքերը։
Իսրայելի կառավարությունը հունիսի 28-ին միաձայն հավանություն էր տվել Արտաքին գործերի նախարար Գիդեոն Սաարի ներկայացրած բանաձևի նախագծին՝ Հայոց ցեղասպանության պաշտոնական ճանաչման վերաբերյալ։ Այժմ փաստաթուղթը պետք է դրվի Քնեսեթի քվեարկությանը։
Ավելի վաղ Թուրքիայի ԱԳՆ-ն քննադատել էր Իսրայելի կառավարության որոշումը՝ այն անվանելով «չարամիտ նախաձեռնություն»։ Անկարայից հետո քննադատությամբ հանդես էր եկել նաև Ադրբեջանը՝ կոչ անելով Իսրայելին վերանայել որոշումը։
