Հայաստանի բնակիչներին մատակարարվող բնական գազի սակագինը մնացել է անփոփոխ, հայտնում են ՀՀ հանրային ծառայությունները կարգավորող հանձնաժողովից։
ՀԾԿՀ-ի հրապարակած հաշվարկների համաձայն՝ ամսական մինչև 10 000 խմ բնական գազ սպառող բնակիչների համար սակագինը մնացել է 143.7 դրամ՝ մեկ խմ-ի դիմաց կամ 143 700 դրամ՝ 1000 խմ-ի դիմաց։
Սոցիալապես անապահով սպառողների համար ևս սակագինը չի փոխվել․ տարեկան մինչև 600 խմ բնական գազի սպառման դեպքում այն մնացել է 100 դրամ՝ մեկ խմ-ի դիմաց կամ 100 000 դրամ՝ 1000 խմ-ի դիմաց։
Հանրային ծառայությունները կարգավորող հանձնաժողովը մայիսի 21-ին հերքել էր գազի գնի հնարավոր բարձրացման մասին «Ժողովուրդ» օրաթերթում հրապարակված տեղեկությունը և նշել, որ այն չի համապատասխանում իրականությանը։
ՌԴ ԱԳՆ պաշտոնական ներկայացուցիչ Մարիա Զախարովան մայիսի 28-ին հայտնել էր, որ Մոսկվան գրավոր զգուշացրել է Երևանին՝ Հայաստանի՝ ԵՄ-ին անդամակցելու դեպքում գազի, նավթամթերքի և ալմաստի վերաբերյալ համաձայնագրերի խզման ռիսկերի մասին։ ՀՀ տարածքային կառավարման և ենթակառուցվածքների նախարար Դավիթ Խուդաթյան ի պատասխան՝ նշել էր, որ Երևանն ի գիտություն է ընդունել Մոսկվայի նամակը։
