«Ուժեղ Հայաստան» կուսակցության անդամ Իրինա Յոլյանը հայտարարել է, որ Սյունիքում մեկ տարվա ընթացքում 869 ընտանիք զրկվել է ընտանեկան նպաստից՝ նպաստառուների թիվը 1219-ից նվազելով մինչև 350։
Նրա խոսքով՝ փոփոխությունը պայմանավորված է անապահովության գնահատման նոր համակարգի ներդրմամբ, որը որպես պիլոտային ծրագիր առաջինը կիրառվել է Սյունիքի մարզում։ Յոլյանի գնահատմամբ՝ իշխանությունն այս կերպ «թղթի վրա աղքատություն է հաղթահարում», մինչդեռ, ըստ նրա, այդ ընտանիքների սոցիալական վիճակը չի բարելավվել։
Յոլյանը նշել է, որ ինքն, ընդհանուր առմամբ, կողմնակից չէ նպաստների երկարաժամկետ տրամադրմանը, սակայն ընդգծել է, որ պետությունը պետք է նախ աշխատատեղեր և եկամտի հնարավորություններ ստեղծի, ապա միայն ընտանիքները դուրս բերի աջակցության համակարգից։ Նրա պնդմամբ՝ Սյունիքում, մասնավորապես՝ Գորիսում, զանգվածային նոր աշխատատեղեր չեն ստեղծվել, ինչի հետևանքով նպաստների դադարեցումը կարող է ավելի վատթարացնել անապահով ընտանիքների վիճակը։
«Հուլիսի 1-ից այս նույն համակարգը տարածվելու է ամբողջ երկրով, այնպես որ՝ հուլիսի մեկից մյուս մարզերի հազարավոր ընտանիքներ կառավարության թեթև ձեռքով սկսելու են «կայծակնային հարստանալ»»,- գրել է նա։
ՀՀ կառավարությունը 2025թ․ հունվարին հայտնել էր, որ անապահովության գնահատման նոր համակարգի գործարկումը մեկնարկելու է Կոտայքի և Սյունիքի մարզերից։ Ընտանիքի անապահովության գնահատման արդյունքում որոշվելու է ընտանիքի անապահովության 4 աստիճան՝ ծայրահեղ անապահով, չափավոր անապահով, միջին անապահով և անապահով: Դրանից էլ կախված՝ ընտանիքին հասանելի սոցիալական ծառայությունների փաթեթներ են տրամադրվելու: Դրանք կարող են լինել նպաստի տեսքով, եռամսյա աջակցության, կոմունալ, կրթական ծառայությունների, առողջապահական ոլորտի որոշակի արտոնություններ և այլն:
