Ռուսաստանը կկարողանա պահպանել Ուկրաինայում ռազմական գործողությունների ներկայիս ծավալն առնվազն մինչև 2027 թվականը։ Նման գնահատական է ներկայացվել ՆԱՏՕ-ում՝ Հաագայում կայացած գագաթնաժողովի ընթացքում, գրում է BBC-ն։
Դաշինքի՝ հետախուզական տվյալների վրա հիմնված եզրակացության համաձայն՝ ռուսական տնտեսությունը դեռ կարող է ֆինանսավորել պատերազմը մի քանի տարի։
Սակայն ՆԱՏՕ-ում նշել են, որ Ռուսաստանի պաշտպանական արդյունաբերությունն արդեն գործում է իր առավելագույն սահմանի չափով, և զենքի արտադրության ծավալների հետագա ավելացում գործնականում հնարավոր չէ։
Միևնույն ժամանակ, ՆԱՏՕ-ի բարձրաստիճան պաշտոնյան BBC-ին ասել է, որ Արևմուտքի դիվանագիտական ջանքերը դեռ Ուկրաինայի պատերազմն ավարտին չեն մոտեցրել։
BBC-ի աղբյուրը նաև նշել է, որ Ուկրաինայի զինված ուժերում կա կադրային պակաս։
«Որքանո՞վ է դա վտանգավոր՝ կախված է նրանից, թե Ուկրաինան ինչ քայլեր է ձեռնարկելու այդ ուղղությամբ։ Անհրաժեշտ են կոնկրետ գործողություններ»,- ընդգծել է դաշինքի ներկայացուցիչը։
Ռուսաստանն ու Ուկրաինան մայիսին և հունիսին բանակցությունների երկու փուլ էին անցկացրել։ Մայիսի 16-ին կողմերն Ստամբուլում անցկացրել էին 2022 թվականից ի վեր առաջին ուղիղ բանակցությունները՝ պայմանավորվելով գերիների փոխանակման և բանակցությունները շարունակելու մասին։ Երկրորդ փուլի արդյունքներով, որը տեղի էր ունեցել հունիսի 2-ին, Մոսկվան և Կիևը պայմանավորվել էին զոհված ուկրաինացի զինվորականների մարմինները հանձնելու, ինչպես նաև ծանր վիրավորում ստացած զինվորականների և 18-25 տարեկան գերիներին փոխանակելու շուրջ:
