Ֆրանսիայի ներքին գործերի նախարարության տվյալներով՝ երկու մարդ մահացել է, հարյուրավոր մարդիկ ձերբակալվել են Ֆրանսիայի տարբեր քաղաքներում, երբ «Փարիզ Սեն Ժերմեն»-ի (ՊՍԺ) երկրպագուները նշել են ակումբի հաղթանակը Չեմպիոնների լիգայի եզրափակչում, հայտնել է BBC-ն:
17-ամյա տղա է մահացել հարավ-արևմտյան Դաքս քաղաքում, նրան դանակահարել են կրծքավանդակի հատվածում՝ ըստ տեղական լրատվամիջոցների։
Փարիզի կենտրոնում 23-ամյա տղամարդը, որը մոպեդ էր վարում, զոհվել է՝ բախվելով մեքենայի, նշվում է դատախազության հաղորդագրությունում։
Հրավառություններ են անցկացվել հաղթանակի բուռն տոնակատարությունների ընթացքում, ջարդվել են ավտոբուսային կանգառներ, այրվել են մեքենաներ։ Սա ՊՍԺ-ի պատմության մեջ առաջին անգամն է, որ ակումբը նվաճել է Եվրոպայի ակումբային ֆուտբոլի ամենահեղինակավոր մրցանակը։
ՊՍԺ-ն դատապարտել է բռնությունները՝ հայտարարելով, որ դրանք «մեկուսացված գործողություններ են, որոնք հակասում են ակումբի արժեքներին և չեն ներկայացնում երկրպագուների մեծամասնությանը»։
Ֆրանսիայի նախագահ Էմանուել Մակրոնն, իր հերթին, հայտարարել է, որ բախումներն «անընդունելի» են և արդարացման ոչ ենթակա, և որ դրանց մասնակիցները կհայտնաբերվեն և կպատժվեն։
Չեմպիոնների լիգայի խաղարկության եզրափակիչ խաղում ՊՍԺ-«Ինտեր» հանդիպումն ավարտվել էր ֆրանսիական թիմի հաղթանակով՝ 5։0 հաշվով։
