Ամերիկահայ կինոգործիչներ Սև Օհանյանը և Մադլեն Շարաֆյանն առաջադրվել են «Օսկար» մրցանակի։ Նրանք կներկայացվեն մարտի 15-ին կայանալիք «Օսկար»-ի 98-րդ մրցանակաբաշխության ժամանակ։
Օհանյանը «Լավագույն ֆիլմ» անվանակարգում առաջադրվել է որպես «Մեղավորներ» ֆիլմի պրոդյուսեր՝ իր գործընկեր պրոդյուսերներ Ռայան Քուգլերի և Զինզի Քուգլերի հետ միասին։ Այս անվանակարգը պատմական նվաճում է Օհանյանի համար. նա առաջին հայազգի ամերիկացին է, որն առաջադրվել է «Օսկար» մրցանակի «Լավագույն ֆիլմ» անվանակարգում։
«Մեղավորները» ֆիլմը մտել է պատմության մեջ՝ դառնալով բոլոր ժամանակների ամենաշատ առաջադրված ֆիլմը՝ ստանալով 16 անվանակարգ։ Նախկինում առավելագույնը՝ 14 անվանակարգ, պատկանում էր «Ամեն ինչ Եվայի մասին», «Տիտանիկ» և «Լա Լա Լենդ» ֆիլմերին։ Ֆիլմը դարձել է տարվա ամենաքննարկվողներից մեկն ամբողջ աշխարհում՝ վաստակելով շուրջ 368 միլիոն դոլար և ստանալով բազմաթիվ անվանակարգեր ու մրցանակներ առաջատար մասնագիտական միություններից և արդյունաբերական կազմակերպություններից։
Ռեժիսոր Շարաֆյանը նույնպես առաջադրվել է։ Սա նրա երկրորդ «Օսկար»-ի անվանակարգն է՝ Disney/Pixar-ի «Էլիո» անիմացիոն ֆիլմի ռեժիսորության համար։ Շարաֆյանը ֆանտաստիկ ֆիլմը համատեղ նկարահանել է Դոմի Շիի և Ադրիան Մոլինայի հետ։ Ֆիլմը նրա լիամետրաժ ռեժիսորական դեբյուտն է։ Այս աշխատանքը նրան դարձրել է առաջին հայը և Pixar-ի պատմության մեջ միայն երրորդ կինը, որը նկարահանել է լիամետրաժ ֆիլմ։
Հայկական կինոընկերությունը նշել է, որ Օհանյանի առաջադրումը համարվում է նշանակալի առաջընթաց համաշխարհային կինոյում հայերի ներկայացվածության համար։ Նախկինում՝ 1989 թվականին, այս մրցանակին առաջադրվել էր հայկական ծագում ունեցող Հենք Մունջինը։
98-րդ «Օսկար» մրցանակաբաշխության արարողությունը տեղի կունենա մարտի 15-ին՝ Լոս Անջելեսի «Դոլբի» թատրոնում։
