Խառը մենամարտերի (ММА) ռուսաստանաբնակ հայազգի մարտիկ Արման Ծառուկյանն (22-3) ընդգրկվել է UFC-ի (Ultimate Fighting Championship) լավագույն մարտիկների վարկանիշում՝ անկախ քաշային կարգերից (P4P), տեղեկանում ենք UFC-ի՝ խառը մենամարտեր անցկացնող միջազգային մարզական կազմակերպության կայքից։
Ծառուկյանը 15-րդ հորիզոնականում է։ P4P վարկանիշը գլխավորում է UFC-ի թեթև քաշային կարգի չեմպիոն Իսլամ Մախաչովը: Երկրորդ հորիզոնականում է ծանր քաշային կարգի տիտղոսակիր Ջոն Ջոնսը։ Լավագույն եռյակը եզրափակում է UFC-ի կիսաթեթև քաշային կարգի նախկին չեմպիոն Իլիա Տոպուրիան, իսկ չորրորդում՝ թեթևագույն քաշային կարգի գոտու գործող չեմպիոն Մերաբ Դվալիշվիլին: Թոփ-5-ը եզրափակում է միջին քաշային կարգի չեմպիոն Դրիկուս դյու Պլեսին:
Հունվարին Լոս Անջելեսում (ԱՄՆ) տեղի էր ունեցել խառը մենամարտերի UFC 311 մրցաշարը։ Առաջնության թեթև քաշային կարգում չեմպիոն Մախաչովը հաղթել էր բրազիլացի Ռենատո Մոյկանոյին և չորրորդ անգամ նվաճել չեմպիոնական գոտին: Մոյկանոն մարտի էր դուրս եկել Ծառուկյանի փոխարեն, որը վնասվածքի պատճառով հրաժարվել էր Մախաչևի դեմ մրցապայքարից։ Փետրվարին Ծառուկյանը համոզմունք էր հայտնել, որ իր և Մախաչովի մենամարտը տեղի է ունենալու։
