Վրաստանի ֆուտբոլի ֆեդերացիայի նախագահ Լևան Կոբիաշվիլին հայտարարություն է տարածել մարտի 23-ին ՈւԵՖԱ Ազգերի լիգայի անցումային փլեյ-օֆֆ փուլի Վրաստան-Հայաստան խաղի ավարտից հետո տեղի ունեցած միջադեպի վերաբերյալ` անընդունելի որակելով հայ երկրպագուների վրա իրեր նետելը։
«Մի քանի հանդիսատես ներխուժել էր խաղադաշտ և տհաճ միջադեպ ստեղծել ինչպես խաղադաշտում, այնպես էլ հյուրերի և երկրպագուների առաջ։ Մեր հյուրերի նկատմամբ նման պահվածքը բացարձակապես անընդունելի է։ Այս գործողություններով մենք ոչ միայն վիրավորեցինք մեր երկիր այցելած երկրպագուներին, այլև զրկեցինք մեր սեփական թիմին երկրպագուների հետ հաղթանակը տոնելու հնարավորությունից: Այս գործողությունները վնասում են վրացական ֆուտբոլին և մեր երկրի իմիջին։ Բացի այդ, այս միջադեպին կարող է հաջորդել ՈւԵՖԱ-ի կողմից տուգանքների կիրառումը, ինչը վնաս կհասցնի մեր ազգային թիմին և վրացի ֆուտբոլասերներին»,- հայտարարել է նա։
Կոբիաշվիլին շնորհակալություն է հայտնել Հայաստանի ազգային հավաքականին և հայ երկրպագուներին ինչպես Թբիլիսիում, այնպես էլ Երևանում բարեկամական մթնոլորտ ստեղծելու համար:
«Հատուկ շնորհակալություն եմ հայտնում Հայաստանի ֆուտբոլի ֆեդերացիային՝ հիանալի հյուրընկալության համար»,- հավելել է Վրաստանի ՀՖՖ նախագահը։
«Ազատությունը» գրել էր, որ Վրաստան-Հայաստան՝ 6-1 հաշվով ավարտված խաղից հետո Թբիլիսիի «Դինամո Արենայում» լարված մթնոլորտ էր ստեղծվել, վրացի երկրպագուները հայերի ուղղությամբ իրեր են նետել։
Մարտի 20-ին ՈւԵՖԱ-ի Ազգերի լիգայի խաղարկության անցումային փլեյ-օֆֆ փուլի առաջին խաղում Հայաստանի ֆուտբոլի ազգային հավաքականը Վազգեն Սարգսյանի անվան «Հանրապետական» մարզադաշտում 0։3 հաշվով պարտվել էր Վրաստանի ընտրանուն։ Մարտի 23-ին Թբիլիսիում կայացած պատասխան խաղում Հայաստանի հավաքականը զիջել էր 1։6 հաշվով։
