Երևանի ավագանու «Քաղաքացիական պայմանագիր» խմբակցության ղեկավար Արմեն Գալջյանը հայտնել է, թե փետրվարի 1-ից տրանսպորտի համար վճարելու դեպքում ինչպես պետք է վարվել, երբ տերմինալները 50 դրամ չեն ընդունում, բայց պետք է վճարել 150 դրամ։
Նա առաջարկել է միանգամից վճարել 300 դրամ և տոմս ձեռք բերել երկու ուղևորության համար։ Նա «կեղծ քարոզչական հնարք» է անվանել պնդումները, թե քաղաքային իշխանությունները «նորից խաբում են, նորից պետք է 300 դրամ տաք, քանի որ տերմինալները 50 դրամ չեն ընդունում»։
«Եթե նույնիսկ տերմինալում 300 դրամ ներդնեք, ապա կստանաք երկու ուղևորատոմս, այսինքն՝ միանգամից ձեռք կբերեք նաև հետդարձի տոմսը։ Եվ եթե այսօր տրոլեյբուսից օգտվող մարդիկ, ովքեր հիմնականում մեծահասակներ են, այս ամենը կարողանում են անել, ապա մյուսները՝ հատկապես երիտասարդները, նույնպես կարող են»,- գրել է Գալջյանը։
Նա հիշեցրել է, որ փետրվարի 1-ից մեկ ուղևորության արժեքը՝ 150 դրամը, քաղաքացիները կարող են վճարել նաև Telcell Wallet-ով, բանկային քարտերով, ինչպես նաև 10 անգամյա փաթեթով, որը հասանելի կլինի տերմինալներում, այդ թվում՝ Telcell հավելվածում։
«Եթե աշխատանքային օրերին ամեն օր առնվազն երկու անգամ երթևեկում եք և հունվար կամ փետրվար ամիսներին ձեռք բերեք 30-օրյա փաթեթը, ապա կստանաք լրացուցիչ 30 օր անվճար։ Այսինքն, եթե ամսվա ընթացքում առնվազն 44 անգամ եք երթևեկում, ապա այդ երկու ամիսների համար մեկ ուղևորության արժեքը փաստացի կկազմի 102 դրամ։ Հավելյալ մեկ ամիս կստանաք նաև 90 և 365-օրյա փաթեթներ ձեռք բերելու դեպքում։ Telcell հավելվածով ձեռք բերելու դեպքում փաթեթներն ավելի մատչելի են` 9000-ը՝ 8800, 24 000-ը՝ 23 600, իսկ 90 000-ը 88 000 դրամ»,- եզրափակել է նա։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը, որն սկսել էր գործել 2025 թվականի հունվարի 1-ից և նախատեսում էր տրանսպորտի թանկացում։
2024 թվականի դեկտեմբերի 20-ին քաղաքապետարանը հետաձգել էր համակարգի ներդրումը մինչև փետրվարի 1-ը։ Հունվարի 19-ին Երևանի նախկին քաղաքապետ Հայկ Մարությանը և «Մայր Հայաստան» դաշինքի առաջնորդ Անդրանիկ Թևանյանը երևանցիներին կոչ էին արել բոյկոտել փետրվարի 1-ից մայրաքաղաքում տրանսպորտի սակագինը բարձրացնելու իշխանությունների ծրագրերը և ստորագրահավաքներ նախաձեռնել տրանսպորտի ուղեվարձի թանկացման դեմ։ Մարությանի թիմը հայտնել էր 76 հազար ստորագրություն հավաքելու մասին և կոչ արել փետրվարի 1-ից, ի նշան բողոքի, հասարակական տրանսպորտից օգտվելու դեպքում վճարել 100 դրամ։
Երևանի քաղաքապետ Տիգրան Ավինյանը հունվարի 28-ին հայտարարել էր, որ Երևանի քաղաքապետարանը որոշել է փետրվարի 1-ից հասարակական տրանսպորտով մեկ ուղևորության համար նոր սակագին սահմանել՝ 150 դրամ։ Ի պատասխան՝ Մարությանը կոչ էր արել փետրվարի 1-ից չչեղարկել բոյկոտը։ Թևանյանը տրանսպորտի գնի վերաբերյալ իշխանության քաղաքականությունը «թուրքական բազար» էր որակել և կոչ արել շարունակել ճնշումը։
