Ադրբեջանի Գաբալա քաղաքում տեղի է ունեցել Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի և երկու երկրների միջև պետական սահմանի սահմանազատման պետական հանձնաժողովի 12-րդ հանդիպումը, հայտնում է ՀՀ ԱԳՆ-ն։
Հանդիպումը կայացել է ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի նախագահությամբ։ Նշվում է, որ կողմերը մանրամասն մտքեր են փոխանակել սահմանազատման միջոցառումների հետ կապված կազմակերպչական և տեխնիկական հարցերի շուրջ:
«Հանդիպման ընթացքում կողմերը նշել են 2025թ. հունվարի 16-ի 11-րդ հանդիպման արդյունքներով ձեռք բերված պայմանավորվածությունը պետական սահմանի սահմանազատման համալիր աշխատանքները հյուսիսային հատվածից՝ Հայաստանի, Ադրբեջանի և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի և Ադրբեջանի սահմանն Իրանի հետ սկսելու վերաբերյալ»,- ասվում է հաղորդագրության մեջ:
Կողմերը պայմանավորվել են աշխատանքային կարգով համաձայնեցնել հաջորդ հանդիպման անցկացման ամսաթիվը ՀՀ քաղաքներից մեկում: Քննարկվել են նաև սահմանազատման աշխատանքների իրականացման կարգի վերաբերյալ համապատասխան ուղեցույցների նախագծերը:
Հունվարի 16-ին Հայաստանի և Ադրբեջանի փոխվարչապետներն անցկացրել էին սահմանազատման հանձնաժողովի հանդիպում: Կողմերը քննարկել էին ուղեցույցների նախագծերը, որոնցով կիրականացվեն երկու երկրի սահմանագծման համալիր աշխատանքները, ինչպես նաև հաջորդ նիստի կազմակերպչական հարցեր:
Սեպտեմբերին տեղի էին ունեցել Հայաստանի և Ադրբեջանի պատվիրակությունների փոխայցելություններ Հայաստանի Սյունիքի մարզի սահմանամերձ շրջաններ և Զանգելանի շրջանի հարավային հատված՝ Գրիգորյանի և Մուստաֆաևի գլխավորությամբ։ Այցերը կազմակերպվել էին սահմանազատման, ականազերծման և երկրների միջև հաղորդակցությունների ստեղծման համար անհրաժեշտ ենթակառուցվածքների կառուցման շարունակական ջանքերի շրջանակներում:
