ԵՊՀ ռեկտոր Հովհաննես Հովհաննիսյանն ի աջակցություն «Տաշիր» ընկերությունների խմբի նախագահ Սամվել Կարապետյանի հավաքին մասնակցելուց հետո աշխատանքից ազատել է Աստվածաբանության ֆակուլտետի դեկան Անուշավան եպիսկոպոս Ժամկոչյանին, հայտնում է 24News-ը։
Ըստ կայքի՝ հուլիսի 10-ին ԵՊՀ ռեկտորն աշխատանքից հեռանալու ծանուցում է ուղարկել Անուշավան Սրբազանին: Նշվում է, որ այդ հանձնարարականը տրվել է կառավարության աշխատակազմից։
ԵՊՀ-ից News.am-ին հերքել են լուրերը, թե Անուշավան Սրբազանի՝ աշխատանքից ազատման պատճառը հավաքներին մասնակցելն է։ ԵՊՀ-ից մանրամասնել են, որ նրա պաշտոնավարման ժամկետն է լրացել։
«Արդեն նոր մրցույթ է հայտարարվել ֆակուլտետի դեկանի պաշտոնի համար»,- հայտնել են ԵՊՀ-ից։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: ՀՀ վարչապետ Նիկոլ Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին «Սրբազան շարժման» առաջնորդ Բագրատ արքեպիսկոպոս Գալստանյանին ու Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև շարժման 14 աջակցի։ Գալստանյանը և «Սրբազան պայքարի» աջակիցները մեղադրվում են պետական հեղաշրջման և ահաբեկչության նախապատրաստության փորձ կազմակերպելու մեջ։ Նրանցից ոչ ոք չի ընդունում մեղադրանքը:
Հուլիսի 10-ին իրավապահներն ահաբեկչության նախապատրաստության դեպքի առթիվ նախաձեռնված քրեական վարույթի շրջանակներում խուզարկություններ էին սկսել դաշնակցականների տներում, հուլիսի 9-ին 2 ամսով կալանավորել էին «Հայաստան խմբակցության» պատգամավոր Արթուր Սարգսյանին։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
