Հունիսի 21-28-ը Հայաստանում և աշխարհում տեղի ունեցած գլխավոր նորությունների, իրադարձությունների ամփոփումն Armenia Today-ի տեսանյութում։
Վարչապետ Նիկոլ Փաշինյանը հայտարարեց պետական հեղաշրջման նախապատրաստման մասին, երբ իշխանամետ լրատվամիջոցները հրապարակեցին իշխանության զավթման ենթադրյալ ծրագրով փաստաթղթի տարբերակը։
Սկսվեցին կասկածյալների խուզարկություններն ու ձերբակալությունները, ԱԱԾ աշխատակիցները ներխուժեցին Շիրակի թեմի առաջնորդարան և Ամենայն Հայոց Կաթողիկոս Գարեգին Բ-ի նստավայր։
Դատարանը երկու ամսով կալանավորեց արքեպիսկոպոս Բագրատ Գալստանյանին և Շիրակի թեմի առաջնորդ Միքայել արքեպիսկոպոս Աջապահյանին։«Սրբազան պայքար» շարժման ևս 16 մասնակից կալանավորվեց։
«Լուսավոր Հայաստան» կուսակցության ղեկավար Էդմոն Մարուքյանը վարչապետին անվստահություն հայտնելու գործընթացի շրջանակում Շիրակի թեմի առաջնորդի ձերբակալությունից հետո հրաժարվեց առաջադրել իր թեկնածությունը վարչապետի պաշտոնում։ Այս նախաձեռնությանը միացավ նաև ընդդիմադիր «Հայաստան» խմբակցությունը։
Աջապահյանը, գտնվելով Քննչական կոմիտեի շենքում, իր փաստաբանի միջոցով հրապարակեց հաղորդագրություն, որում կոչ էր անում իրեն չնշել վարչապետի թեկնածուների շարքում։
«Տաշիր» ընկերությունների խմբի բանտարկված ղեկավար Սամվել Կարապետյանը Հայաստանում ներքին համաձայնության կոչ արեց։
Կարապետյանը ստեղծեց փաստաբանական խմբեր՝ անօրինականությունների հետևանքով տուժածներին անվճար օգնություն տրամադրելու համար։
Փաշինյանը հայտարարեց «Հայաստանի էլեկտրական ցանցերը» պետականացնելու ծրագրի պատրաստակամության մասին։ Հաջորդ շաբաթ նա ակնկալում է արագորեն այս որոշումը խորհրդարանում ընդունել։
Պետական վերահսկողության ծառայության ղեկավարը չի բացառել պետականացումից հետո «ՀԷՑ»-ի վաճառքը մասնավոր բիզնեսին։ Այս հայտարարություններից հետո Թուրքիայի էներգետիկայի նախարարը Ստամբուլում Հայաստանի տարածքային կառավարման և ենթակառուցվածքների նախարարի հետ հանդիպման ժամանակ քննարկել է երկու երկրների միջև էներգետիկ ոլորտում համագործակցությունը։
Իրանի դեսպանը Հայաստանում հայտարարեց, որ Իսրայելը կարող էր օգտագործել Ադրբեջանի տարածքն Իրանի վրա հարվածներ հասցնելու համար։
