Հունիսի 25-ին «Հոմպլեքս» մոլի պաշտոնական բացման ընթացքում գրանցված էլեկտրամատակարարման ընդհատումը ՀԷՑ-ի էլեկտրատնտեսության սպասարկման տիրույթից դուրս էր, հայտարարել է ՀԷՑ-ը։
Կառավարության հունիսի 26-ի նիստի ժամանակ ՀՀ վարչապետ Նիկոլ Փաշինայնը հայտարարել էր, որ նախորդ օրը մասնակցել է հիպերմոլի բացման արարողությանը, որի ժամանակ այն հոսանքազրկվել է։ Փաշինյանը նշել է, որ դա կա՛մ հատուկ սաբոտաժ է, կա՛մ տեխնիկապես հագեցած չլինելու խնդիր։
ՀԷՑ-ից շեշտել են, որ «Հոմպլեքս»-ի սնուցումն ապահովվում է երկու ուղղություններից և դրնացից ոչ մեկը «Հայաստանի էլեկտրական ցանցեր» ընկերությանը չի պատկանում։ Դրանցից մեկը պատկանում է «Կարիտաս» ընկերությանը, մյուսը՝ ՀՀ Պետական եկամուտների կոմիտեին, պարզաբանել է ընկերությունը։
Չնայած նրան, որ ընկերությունը վթարի վերացման որևէ պարտավորություն չուներ, հաշվի առնելով խնդրի կարևորությունը՝ վթարի ընթացքում գործի է դրել նորոգող 4 բրիգադների, որոնք վերացրել են վթարը, տեղեկացրոլ են ընկերությունից։
Փաշինյանը ՀԷՑ-ը պետականացնելու մտադրության մասին հայտարարել էր, երբ ՀԷՑ-ի սեփականատեր, «Տաշիր» ընկերությունների խմբի նախագահ Սամվել Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները: Կարապետյանի հայտարարություններից հետո նրա տանը խուզարկություններ էին կատարվել։ Հետո նրա նկատմամբ քրեական հետապնդում էր սկսվել իշխանությունը զավթելու կոչեր անելու մեղադրանքով։ Փաշինյանի հայտարարությանը հաջորդել էր նաև Հանրային ծառայությունները կարգավորող հանձնաժողովի՝ ՀԷՑ-ին խախտումների համար 10 մլն դրամ գումարի չափով տուգանելու որոշումը։
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահին։ Կարապետյանին, ում ընկերությունը ՀԷՑ-ը գնելուց ի վեր շուրջ 700 մլն դոլար է հատկացրել էլեկտրամատակարարման որակի բարձրացմանը, Փաշինյանը մեղադրել էր ժողովրդին վնաս հասցնելու և դիտավորյալ անջատումներ կազմակերպելու մեջ։
Կարդացեք նաև՝
ՀԷՑ-ի պետականացման պլանը պատրաստ է․ Փաշինյան
ՀԷՑ-ի անձնակազմը լիակատար աջակցություն է հայտնել Սամվել Կարապետյանին
