Վերջին օրերին եկեղեցու և եկեղեցականների հասցեին վարչապետ Նիկոլ Փաշինյանի հնչեցրած արտահայտությունները համընդհանուր վրդովմունք են առաջ բերել, «Զվարթնոց» օդանավակայանում հայտարարել է Ամենայն Հայոց կաթողիկոս Գարեգին Բ-ն։
Նա նշել է, որ մարդկանց վերաբերմունքն ավելի է պարտավորեցնում եկեղեցականներին իրենց առաքելությունը նույն նվիրումով ու հավատարմությամբ իրականացնել։
Նա, միաժամանակ, հորդորել է այս դժվարին ժաանակներում ամուր ու հաստատուն պահել միաբանությունը։
«Թույլ չտանք, որ որևէ կերպ մեր կյանքում տեղ գտնեն այնպիսի արարքներ ու գործողություններ, որոնք կվտանգեն մեր ազգային միասնությունը։ Հավատում ենք, որ մեր միասնական ջանքերով, կարողությունների մեկտեղումով պիտի կարողանանք դիմակալել բոլոր փորձությունները, հարթել բոլոր դժարությունները, լավատեսությամբ, հույսով ու հավատով կերտել մեր ու մեր զավակների վաղվա պայծառ օրը»,- շեշտել է Հայոց Հայրապետը։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել Համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Մանրամասները՝ տեսանյութում։
