Գլխավոր դատախազ Աննա Վարդապետյանն ԱԺ նախագահ Ալեն Սիմոնյանին միջնորդագիր է ներկայացրել «Հայաստան» խմբակցության պատգամավոր Արթուր Սարգսյանի նկատմամբ հանրային քրեական հետապնդում հարուցելուն և ազատությունից զրկելուն համաձայնություն տալու մասին։
Միջնորդության մեջ նշվում է, որ դատախազությունը մարտի 18-ին ԱԱԾ-ից հաղորդում էր ստացել այն մասին, որ Վազգեն Գալստանյանը (Բագրատ արքեպիսկոպոս Գալստանյան-խմբ․), Արթուր Սարգսյանը, Մովսես Շարբաթյանը, Հայկ Շահնազարյանը, Տիգրան Թոփալյանը, Իգոր Սարգսյանը և ուրիշներ 2024 թվականի հուլիսից մինչև 2025 թվականի մարտի 14-ը Սարգսյանի հետ նախապատրաստել են ահաբեկչություն և իշխանության յուրացում։
Պատգամավորի նկատմամբ հանրային քրեական հետապնդում էր հարուցվել ՀՀ քրեական օրենսգրքի 43-308-րդ հոդվածի 1-ին մասով (ահաբեկչության նախապատրաստությունը, առավելագույն պատիժը՝ 12 տարվա ազատազրկում) և 4-419-րդ հոդվածի 1-ին մասով (իշխանությունը յուրացնելը, առավելագույն պատիժը՝ 15 տարվա ազատազրկում)։
Հունիսի 13-ին Հակակոռուպցիոն դատարանը Սարգսյանին մեղավոր էր ճանաչել պաշտոնեական լիազորությունները չարաշահելու և պաշտոնեական կեղծիք կատարելու մեջ։
«Սրբազան պայքար» շարժման առաջնորդ, արքեպիսկոպոս Բագրատ Գալստանյանը և ևս 14 նրա աջակիցներ կալանավորվել են ահաբեկչության և իշխանությունը յուրացնելու նախապատրաստություն կատարելու մեղադրանքով, Շիրակի թեմի առաջնորդ Միքայել սրբազան Աջապահյանը՝ իշխանության զավթման կոչի համար: Նրանք մեղքը չեն ընդունում:
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահ Սամվել Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
