Երևանի Հյուսիսային պողոտայում քաղաքապետարանի աշխատակիցներն ապամոնտաժում են գործարար Սամվել Կարապետյանի լուսանկարով և նրան ազատ արձակելու կոչ պարունակող պաստառներով էկրանները։ Ապամոնտաժումն ընթանում է սեփականատիրոջ տարածքում, որտեղ էկրանները տեղադրվել են օրինական հիմքերով։ Աշխատանքներն իրականացնում են քաղաքացիական հագուստով անձինք։
Armenia Today-ի տվյալներով՝ քաղաքապետարանի ներկայացուցիչներն ավելի վաղ պահանջել էին հեռացնել էկրանները՝ սպառնալով, որ հակառակ դեպքում դրանք կապամոնտաժեն իրենց ուժերով։
«Հանքաշար» ընկերության ներկայացուցիչ, փաստաբան Մերի Գևորգյանը լրագրողների հետ զրույցում քաղաքապետարանի այս գործողությունները, որոնց հիմքում Սամվել Կարապետյանի ազատ արձակման պահանջն էր, որակեց որպես թիրախավորված հարձակում գործարարի նկատմամբ։
«Նրանք ասում են, որ էկրանները կապամոնտաժեն, եթե մենք չհեռացնենք նման հաղորդագրությունները։ Փաստացի, նրանք մեզ ստիպում են դադարեցնել մեր իրազեկումը, որը բառացիորեն այդպիսին է՝ իրազեկում է, ոչ թե գովազդ, և մենք նման բան անելու մտադրություն չունենք», – նշեց Գևորգյանը։
Փաստաբանը շեշտեց, որ խնդիրը բովանդակության մեջ է։ Նա լրագրողներին ներկայացրեց էկրանների տեղադրման բոլոր թույլտվությունները, որոնք տրամադրվել են հենց քաղաքապետարանի կողմից։
Նախկինում նույն էկրաններով հեռարձակվել են նաև գործող քաղաքապետ Տիգրան Ավինյանի նախընտրական նյութերը։ Գևորգյանի խոսքով՝ երբեք որևէ բողոք չեն ստացել, թե տվյալ էկրաններին հնարավոր չէ Տիգրան Ավինյանի լուսանկարները ցուցադրել։
Երևանի քաղաքապետարանի առևտրի, սպասարկման և գովազդի վարչության պետ Արմեն Առաքելյանն ապամոնտաժումը պատճառաբանել է 2023 թվականի ապրիլին ընդունված և 2024-ի սկզբից ուժի մեջ մտած նոր կարգավորումներին չհամապատասխանելու հանգամանքով։ Նա հերքել է քաղաքապետարանի գործողությունների մեջ քաղաքական ենթատեքստի առկայությունը՝ նշելով միայն, որ էկրանների չափերը չեն համապատասխանել սահմանված չափանիշներին։
Լրագրողների հարցին, թե ինչու այս էկրանների գոյության մասին հիշեցին միայն մեկուկես տարի անց՝ հենց այն ժամանակ, երբ դրանց վրա հայտնվել է Սամվել Կարապետյանին ազատ արձակելու կոչը, Առաքելյանը չի պատասխանել։ Նա միայն նշել է, որ 2024 թվականի հունվարից ի վեր Երևանում ապամոնտաժվել է շուրջ 30 հազար արտաքին գովազդային միջոց, այդ թվում՝ 600 բիլբորդ և ավելի քան 1000 լուսային գովազդային վահանակ, և դեռ մեծ ծավալով աշխատանք կա անելու, ինչը միանգամից իրականացնել հնարավոր չէ։
Սամվել Կարապետյանին ազատելու կոչով էկրաններն ապամոնտաժելու համար ընկերության ներկայացուցիչների հաղորդումը ոստիկանությունում չեն ընդունել․ իրավաբան
«Հանքաշար» ՍՊԸ-ի փաստաբան Մերի Գևորգյանն ավելի ուշ Armenia Today-ին հայտնել է, որ հանցագործության մասին ոստիկանություն կատարված զանգերը որևէ արդյունք չեն տվել:
Նա պարզաբանել է, որ ոստիկանություն զանգելուց հետո իրենց հորդորել են մոտենալ դեպքի վայրում հերթապահող ոստիկաններին, սակայն երբ փորձել են հաղորդել հանցագործության և քաղաքապետարանի աշխատակիցների կողմից մասնավոր տարածք ներխուժելու մասին, ոստիկանությունը որևէ քայլ չի ձեռնարկել։
