ՀՀ բնակիչները երկու օրվա ընթացքում ինքնակամ հանձնել են 91 զենք-զինամթերք, հայտնում է ՀՀ ՆԳՆ մամուլի ծառայությունը։
Նշվում է, որ փետրվարի 17-ին և 18-ին ՆԳՆ ստորաբաժանումներում հանձնվել է 2 գնդացիր, 30 ինքնաձիգ, 2 նռնականետ, 20 մարտական և 1 գազային ատրճանակ, 11 ակոսափող և 25 ողորկափող հրացան։
ՆԳՆ Արմավիրի, Արագածոտնի, Կոտայքի, Գեղարքունիքի, Շիրակի, Վայոց ձորի մարզային և Երևան քաղաքի վարչություններում արձանագրվել է ապօրինի պահվող զենք-զինամթերքի կամավոր հանձնման 15 դեպք։
Համայնքային ոստիկանության Սևանի, Ճամաբարակի, Տավուշի, Ախուրյանի, Կապանի, Արմավիրի, Նոյեմբերյանի բաժիններում էլ արձանագրվել են ինքնաձիգներ, հրացաններ, նռնականետ, ատրճանակներ, նռնակներ և ռազմամթերք կամավոր հանձնելու դեպքեր։
Գերատեսչությունից հավելել են, որ հունվարի 1-ից փետրվարի 18-ը ՆԳՆ-ի կողմից հայտնաբերվել, առգրավվել, նաև՝ կամավոր հանձնվել է ընդհանուր 398 միավոր զենք, անցած տարվա նույն ժամանակահատվածի համեմատ՝ 126-ով ավելի։
Փետրվարի 17-ին ՀՀ ՊՆ-ն հայտնել էր, որ ՊՆ ռազմական ոստիկանության Սյունիքի մարզի Կապանի բաժին էր հանձնվել զենք-զինամթերքի խմբաքանակ։ Հունվարի 16-ին ՀՀ ներքին գործերի նախարար Արփինե Սարգսյանը, ի պատասխան Armenia Today-ի հարցի, հայտնել էր, որ 2024 թվականին հանձնվել է 1600 ապօրինի պահվող հրազեն, որը 10,7 տոկոսով ավելի է 2023 թվականի ցուցանիշից։
