ՀՀ վարչապետ Նիկոլ Փաշինյանի՝ Հայ առաքելական եկեղեցու դեմ գրառումները դադարեցնելու պատճառը տարածաշրջանային անկայունությունն է՝ Իրան-Իսրայել պատերազմը, գրել է «Հրապարակ»-ը՝ հղում անելով իշխանական աղբյուրին։
Ըստ թերթի՝ Փաշինյանը գիտակցում է, որ եկեղեցու դեմ գրառումները հատկապես այս օրերին իրեն չեն ներվի, ուստի սպասում է, որ իրադարձությունները հանդարտվեն:
«Այս լռությունը թվացյալ է, վարչակարգը շարունակում է ծածուկ աշխատել եկեղեցու դեմ․ հավաքում են փաստեր, կոմպրոմատներ, մարտավարություն են մտածում»,- գրել է լրատվականը:
Հունիսի 16-ին եկեղեցում կլոր սեղան էր կազմակերպվել՝ բարձրաստիճան հոգևորականների, քաղաքական, հասարակական գործիչների մասնակցությամբ, նրանք քննարկել էին Փաշինյանի գրառումները, կոշտ գնահատականներ տվել։
Մայիսի 29-ին ՀՀ վարչապետ Նիկոլ Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Հունիսի 11-ին՝ կեսգիշերն անց, Ամենայն Հայոց կաթողիկոսն ԱՄԷ-ից վերադարձել էր Հայաստան, նրան դիմավորել էին քաղաքացիները: Գարեգին Բ-ն հայտարարել էր՝ վարչապետի հայտարարությունները համընդհանուր վրդովմունք են առաջացրել:
