Ռուսաստանի Դաշնային խորհրդի նախագահ Վալենտինա Մատվիենկոյի երևանյան այցին զուգահեռ՝ ՀՀ խորհրդարանի դիմաց ընթացած ակցիաների ժամանակ որևէ մեկը բերման չի ենթարկվել, Armenia Today-ին հայտնեցին ՆԳՆ ոստիկանությունից:
Մատվիենկոյի գլխավորած պատվիրակությունը Հայաստան էր ժամանել հունիսի 5-ին: Այսօր՝ հունիսի 6-ին, նա և ԱԺ նախագահ Ալեն Սիմոնյանը խորհրդարանում հանդես էին եկել հայտարարություններով:
Զուգահեռ՝ Ազգային շենքի դիմաց երկու ակցիա էր ընթանում՝ մեկն ընդդեմ Ռուսաստանի և ռուս բարձրաստիճան պաշտոնյայի այցի, մյուսը՝ ի պաշտպանություն ու աջակցություն ՌԴ-ին և այցին:
Ցույցի մասնակիցների ձեռքերում հակառուսական պաստառներ էին, նրանք նաև հակառուսական կոչեր են արել՝ հայտարարելով ԵՄ-ի և ԱՄՆ-ի հետ հարաբերությունների սերտացման անհրաժեշտության մասին։ Ակցիայի մասնակիցներն իրենց բողոքը նման կերպ հայտնել էին նաև ՌԴ արտգործնախարար Սերգեյ Լավրովի այցի ժամանակ՝ ԱԳ նախարարության շենքի դիմաց, ապա աջակցել Ֆրանսիայի արտաքին քաղաքական գերատեսչության ղեկավար Ժան-Նոել Բարոյի այցին:
Այսօր տեղի ունեցած ցույցի ռուսամետ մասնակիցները ձեռքում պահել են պաստառներ, որոնց վրա գրված էր «Եղբայրություն, աջակցություն, միասնություն», և ընդգծել են Երևանի ու Մոսկվայի հարաբերությունների հետագա խորացման կարևորությունը։
Ակցիաների մասնակիցները պարբերաբար վիճաբանել են միմյանց հետ:
Լրագրողների հետ ճեպազրույցում Մատվիենկոն հայտարարել է՝ Ռուսաստանի և Հայաստանի միջև հարաբերությունները վստահության ճգնաժամ չեն ապրում։
«Նման զգացողություն չունեմ։ Ընդհակառակը, ինչպես մենք, Հայաստանը նույնպես ցույց է տվել իր շահագրգռվածությունը մեր երկկողմ համագործակցության զարգացման ընդլայնման հարցում»,- նշել է Մատվիենկոն։
Սիմոնյանն էլ շեշտել է, որ հայ-ռուսական գործընկերային հարաբերությունները հարուստ պատմություն ունեն, որոնք հիմնված են փոխադարձ հարգանքի, վստահության և երկու ժողովուրդների դարավոր բարեկամության վրա։
Մայիսի 22-23-ը Հայաստանում էր նաև Լավրովը: Նա Երևանում հայտարարել էր՝ Մոսկվան պատրաստ է օգնել ՀՀ-ին լուծել այն բոլոր հարցերը, որոնք կարգավորում են պահանջում Բաքվի հետ համաձայնագրի ստորագրման համար:
Լավրովի այցին հաջորդել էր Ֆրանսիայի ԱԳ նախարարի այցը Հայաստան: Նա մայիսի 26-ին Երևանում հայտնել էր, որ Ֆրանսիան պատրաստվում է Գորիսում հյուպատոսական գործակալություն բացել:
