ՀՀ արտաքին գործերի նախարար Արարատ Միրզոյանը Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալլասի հետ քննարկել է Երևանի և Բաքվի միջև խաղաղության և միջպետական հարաբերությունների հաստատման մասին համաձայնագրի ստորագրման հարցը, հայտնում է ՀՀ ԱԳՆ մամուլի ծառայությունը։
Բրյուսելում հանդիպման ժամանակ Միրզոյանը և Կալլասը Հարավային Կովկասում խաղաղության հաստատման ջանքերի համատեքստում շեշտել են Հայաստանի և Ադրբեջանի միջև խաղաղության պայմանագրի ստորագրման առանցքային նշանակությունը։
Նրանք քննարկել են նաև ՀՀ-ԵՄ գործընկերության խորացման հարցում ձևավորված տեսլականն ու հեռանկարները։
Ապրիլի 25-ին Կալլասն այցելել էր Ադրբեջան և խոսել Երևանի հետ խաղաղության հասնելու անհրաժեշտության մասին:
Մարտի 13-ին Ադրբեջանի ԱԳՆ-ն հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Ըստ Բաքվի՝ հայկական կողմը հայտնել է, որ ընդունել է վերջին երկու կետերը, որոնք մինչ այդ համաձայնեցված չէին։ Պաշտոնական Երևանը հաստատել էր նախագծի հաստատման ավարտը և հայտարարել, որ պատրաստ է Բաքվի հետ սկսել խորհրդակցություններ՝ համաձայնագրի ստորագրման ժամկետների և վայրի շուրջ։
Հայաստանի վարչապետ Նիկոլ Փաշինյանը Մեծ Հայրենական պատերազմում Հաղթանակի 80-ամյակի կապակցությամբ հղած շնորհավորական ուղերձում հայտարարել էր, որ «ի հեճուկս բոլոր սադրանքների»՝ Երևանի և Բաքվի միջև պատերազմ չի լինելու: Նա հիշեցրել էր, որ խաղաղության պայմանագրի նախագիծը համաձայնեցված է և սպասում է ստորագրմանը։
