Մոսկվայի «Алые паруса» էլիտար բնակելի համալիրի շքամուտքում տեղի ունեցած պայթյունը, որի հետևանքով զոհվել է «Արբատ» գումարտակի հիմնադիր, Դոնեցկի բռնցքամարտի ֆեդերացիայի ղեկավար Արմեն Սարգսյանը, հնարավոր է Հայաստանից ժամանած մահապարտ ահաբեկիչը կազմակերպած լինի։ Այս մասին հայտնում է «Ինտերֆաքս»-ը՝ հղում անելով իր աղբյուրներին։
Ինչպես հայտնում է լրատվամիջոցը, հետաքննությունը որպես առաջնահերթ պատճառ դիտարկում է ազդեցության ոլորտների վերաբաշխումը։ «Մահապարտ-ահաբեկիչը, ըստ նախնական տվյալների, գործի է դրել իր հետ բերած պայթուցիկ սարքը։ Ստուգվում է նաև վարկածը, որ նա եկել է Հայաստանից»,- հայտնել է իրավապահ մարմիններում գործակալության աղբյուրը։
Միաժամանակ քննիչները չեն բացառել ուկրաինական հատուկ ծառայությունների հնարավոր ներգրավվածությունը։ Եթե այս վարկածը հաստատվի, ապա քրեական գործը կարող է վերաորակավորվել այլ հոդվածով, նշել է «Ինտերֆաքս»-ի աղբյուրը։
Ինչպես հայտնում է Shot Telegram ալիքը, ահաբեկիչը պայթուցիկ սարք է ամրացրել իր մարմնին և ակտիվացրել այն պահին, երբ Սարգսյանը դուրս էր գալիս վերելակից։Shot-ը նաև նկարագրել է ենթադրյալ մահապարտ-ահաբեկչին որպես 40-ն անց տղամարդ:
«Կոմերսանտ»-ի աղբյուրը պարզաբանել է, որ մահապարտը ոչ թե ինքնաշեն պայթուցիկ սարք է օգտագործել, այլ MON-50 հակահետևակային բեկորային ական։ Ըստ հրապարակման՝ ահաբեկիչն ազգությամբ հայ է, ում նախկինում քրեական մեղադրանք է առաջադրվել։
Մոսկվայում փետրվարի 3-ին «Алые паруса» բնակելի համալիրում մահափորձի արդյունքում սպանվել էր հայկական գումարտակի հիմնադիր, Դոնեցկի բռնցքամարտի ֆեդերացիայի նախագահ Արմեն Սարգսյանը։
