Աջափնյակ վարչական շրջանի ղեկավարի նախկին տեղակալ Սերոբ Սարգսյանը կարող է փոխարինել նոյեմբերի 8-ին հրաժարական տված համայնքի ղեկավար Կամսար Բաբինյանին, գրել է «Հրապարակը»։
Թերթի տեղեկություններով՝ «Քաղաքացիական պայմանագիրը» ղեկավարի պաշտոնի մի քանի թեկնածուի է քննարկել, սակայն կանգ է առել Սարգսյանի վրա՝ որպես կուսակցության նվիրյալ հետևորդի։
Լրատվամիջոցը հիշեցրել է Սարգսյանի և զոհված զինվորների ծնողների միջև 2022 թվականին տեղի ունեցած միջադեպը, երբ Աջափնյակի նախկին փոխթաղապետը նրանց անվանել էր «փնթի»։
«Մեղադրանքը հերքելու համար նա դատական հայց է ներկայացրել Yerkir.am-ի լրագրող Լիա Սարգսյանի դեմ, սակայն դատարան եկած ծնողները ցուցմունք էին տվել, հաստատել, որ նման բան ասել է, և դատարանը մերժել էր հայցը»,- պարզաբանել է «Հրապարակ»-ը։
Նոյեմբերի 8-ին Բաբինյանը հայտնել էր, որ դադարեցնում է վարչական շրջանի ղեկավարի լիազորությունները: Նա չէր մանրամասնել հրաժարականի պատճառը։
