Հայաստանում հայտնաբերել են ավելի քան 10 կգ «մեթամֆետամին» տեսակի թմրամիջոց, որի շուկայական արժեքը գերազանցում է 800 միլիոն ՀՀ դրամը, հայտնում է Պետական եկամուտների կոմիտեի մամուլի ծառայությունը:
Գերատեսչությունից հաղորդում են, որ Մեղրիի անցակետում զննման են ենթարկել Իրանից Հայաստան ժամանած ԻԻՀ քաղաքացի Ղ.Ա.-ի կողմից շահագործվող ավտոբուսը, ինչի արդյունքում հայտնաբերվել է շագանակագույն կաշվե պայուսակ՝ լցված «մեթամֆետամին» տեսակի թմրամիջոցի բյուրեղանման զանգվածներով: Պարզվել է, որ նշված պայուսակը Հայաստանում պետք է ստանա Չինաստանի քաղաքացի Լ. Լ.-ն:
«Ձեռնարկված օպերատիվ-հետախուզական միջոցառման շրջանակում «մետամֆետամին» տեսակի թմրամիջոցի բյուրեղանման զանգվածներով պայուսակի փոխարեն նույնանման փոխարինված զանգվածներով պայուսակն ստանալուց հետո ձերբակալվել է Լ. Լ.-ի կինը` ՀՀ քաղաքացի Ս. Խ.-ն: Վերջինս, իր բնակարանում ունեցել է նշված կաշվե պայուսակին նմանվող ևս 3 պայուսակ և դրանք հանձնել է ՊԵԿ աշխատակիցներին: Զննության արդյունքում պարզվել է, որ նշված պայուսակների նույնպես լցված են «մեթամֆետամին» տեսակի թմրամիջոցի բյուրեղանման զանգվածներով»,- հայտնում է ՊԵԿ-ը:
Այնուհետև ձերբակալվել է ինքնակամ ներկայացած Չինաստանի քաղաքացին, որտեղից էլ վերջինս տեղափոխվել է ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն:
Հիշյալ դեպքով ձեռնարկված միջոցառումների արդյունքում շրջանառությունից դուրս է բերվել ավելի քան 10 կգ քաշով «մեթամֆետամին» տեսակի թմրամիջոց, որի շուկայական արժեքը գերազանցում է 800 միլիոն ՀՀ դրամը:
Դեպքի առթիվ Քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում թմրանյութերի ապօրինի շրջանառության ու մաքսանենգության նախաձեռնվել է քրեական վարույթ, կատարվում է նախաքննություն:
Պատգամավոր Ագնեսա Խամոյանն Ազգային ժողովում հայտարարել էր, որ 2023թ. 10 ամիսների ընթացքում արձանագրվել է թմրամիջոցների ապօրինի շրջանառության հետ կապված հանցագործությունների 3934 դեպք՝ նախորդ տարվա նույն ժամանակահատվածի 1631 դեպքի դիմաց. աճը կազմել է 141 տոկոս: Նրա խոսքով՝ աճել է հատկապես բնակչության առողջության համար առավել վտանգ ներկայացնող սինթետիկ թմրամիջոցների անօրինական շրջանառությունը:
