Առողջապահության համաշխարհային կազմակերպությունը զեկույց է հրապարակել Հայաստանում Արցախից տեղահանված փախստականների առաջնային կարիքների ու ցուցաբերված օգնության մասին:
Ըստ զեկույցի՝ 2023 թվականի նոյեմբերի 13-ի դրությամբ Արցախից Հայաստան է հասել 101 848 մարդ, ընդհանուր տուժածների թիվը՝ ներառյալ փախստականները և ընդունող բնակչությունը, կազմում է 196 000: Հաղորդվում է, որ փախստականների 48%-ը արական սեռի է, իսկ 52%-ը՝ իգական։ Ամենամեծ խոցելի խմբերը երեխաներն են (29%), տարեցները (12%) և հիվանդ, հաշմանդամություն ունեցող մարդիկ (2%):
«ՄԱԿ-ի փախստականների հարցերով գերագույն հանձնակատարի (UNHCR) նախնական գնահատականները վկայում են այդ մասին, որ 41 907 փախստական դեղորայքի և բժշկական օգնության կարիք ունի»,- ընդգծում է ԱՀԿ-ն։
Սեպտեմբերի կեսերից ԱՀԿ-ն Հայաստան է ուղարկել 1672 կիլոգրամ բժշկական պարագաներ, որոնց արժեքը գերազանցում է 71 300 ԱՄՆ դոլարը:
ԱՀԿ-ն հայտնում է, որ Եվրոպայի տարածաշրջանային գրասենյակը հաստատել է Հայաստանի համար առաջիկա վեց ամիսների համար ընդհանուր 2,9 մլն ԱՄՆ դոլար տրամադրելու դիմումը:
ՄԱԿ-ի հայաստանյան գրասենյակը խնդրել է 97 միլիոն ԱՄՆ դոլար՝ որպես Հայաստանի փախստականներին հրատապ մարդասիրական օգնություն: Առողջապահության ոլորտը հայտնել է առողջապահության ոլորտի համար ավելի քան 10,5 մլն ԱՄՆ դոլարի անհրաժեշտության մասին:
Որպես առաջիկա քայլեր, ԱՀԿ-ն նախատեսում է ընդլայնել գործող ծրագիրը տուժած փախստականների և ընդունող բնակչության վրա, բարելավել հսկողությունը և արձագանքել հիվանդությունների բռնկումներին, ընդլայնել ռիսկերի գնահատումը և համայնքի ներգրավվածությունը, բարձրացնել իմունիզացիոն գործողությունները կարմրուկի, պոլիոմելիտի և COVID-19-ի համար և աջակցել առողջության առաջնային պահպանման ծառայությունների ընդլայնմանը:
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ, որի հետևանքով զոհվել է ավելի քան 200, վիրավորվել՝ ավելի քան 300 արցախցի, գերեվարվել են 16-ը, խոշտանգվել՝ 14-ը, անհետ կորել՝ 42-ը։ ԼՂ-ից ՀՀ է տեղափոխվել 100․632 մարդ։
Սեպտեմբերի 28-ին Արցախի նախագահ Սամվել Շահրամանյանն Արցախի պետական համակարգը լուծարելու հրամանագիր էր ստորագրել, համաձայն որի՝ 2024-ի հունվարի 1-ից Արցախի Հանրապետությունը կդադարի գոյություն ունենալ։
