«Ուժեղ Հայաստան» դաշինքի ներկայացուցիչ, փաստաբան Արամ Վարդևանյանը սոցիալական ցանցերում հրապարակված տեսաուղերձում անդրադարձել է ընդդիմության ներկայացուցիչների նկատմամբ հարուցված քրեական գործերի նոր ալիքի ու «Բարգավաճ Հայաստան» կուսակցության առաջնորդ Գագիկ Ծառուկյանի կալանավորմանը և ամփոփել Սահմանադրական դատարանի որոշումը՝ ուժի մեջ թողնել հունիսի 7-ի խորհրդարանական ընտրությունների արդյունքները։
Վարդևանյանը նշել է, որ երկրում վերջին օրերին քաղաքական հետապնդումների նոր ալիք է ձևավորվել և քաղաքական դրդապատճառներով անազատության մեջ գտնվողների թիվը հասել է աննախադեպ ցուցանիշի։
«Այս ժամանակահատվածում քաղաքական բանտարկյալների թիվը նաև ոչ միայն քաղաքական հետապնդումների, պատմական ռեկորդի է մոտենում»,- ասել է Վարդևանյանը։
Նա այս գործընթացն անվանել է հասարակությանը պառակտելու, բաժանելու փորձ և իրավունքի նսեմացում, որը պետք է դադարեցնել։
«Դա մեծագույն ցավ է և ողբերգություն է, որը մենք տեսնում ենք մեր հասարակության մեջ։ Սա հերթական անգամ հասարակությանը պառակտելու, բաժանելու վարքագիծն է, որը չպետք է տեղի ունենա, բայց տեղի է ունենում։ Ինչի՞ համար է տեղի ունենում, որովհետև մեզ մոտ ժողովրդավարական իրական արժեքների Մենք իրավունքի գերակայությունից գնում ենք իրավունքի նսեմացման, բայց այս խնդիրները այո, պետք է հաղթահարվեն, դրա համար պետք է վճռականություն»,- ասել է նա։
Վարդևանյանի խոսքով՝ «Բարգավաճ Հայաստան» կուսակցության առաջնորդ Գագիկ Ծառուկյանի ձերբակալության ժամանակ ուժի կիրառումը չի համապատասխանել օրինականության, անհրաժեշտության և համաչափության սկզբունքներին։
«Մենք տեսանք տեսարանը Գագիկ Ծառուկյանի նկատմամբ, անձ, ով 2004-2005 թվականից քաղաքական ակտիվ գործընթացների մեջ է։ Լավ, ընդհանրապես ֆիզիկական ուժի գործադրումը չի կարող լինել ինքնանպատակ։ Այն պետք է լինի օրինական, այն պետք է լինի լինի անհրաժեշտ, այն պետք է լինի համաչափ, դրանցից ոչ մեկն առկա չէր»,- նշել է նա։
Վարդևանյանը հավելել է, որ արդարադատությունը պետք է վեր լինի քաղաքական հրահանգներից։
«Կարող է լինել քաղաքական իշխանության ցանկություն, կարող է լինել քաղաքական պատվեր, որոնք ձևական առումով օրենքի շրջանակներում փաթեթավորվեն, բայց իրավունքը պետք է ճեղքի այդ ամենը և գերակայողը լինի»,- ասել է նա։
Ամփոփելով Սահմանադրական դատարանում գործի քննության արդյունքները՝ Վարդևանյանը հայտարարել է, որ չնայած ընտրությունների արդյունքներն ուժի մեջ թողնելու ՍԴ որոշմանը, դատարանը հաստատել է խորհրդարանական ընտրությունների ընթացքում տեղի ունեցած մի շարք խախտումներ։
Վարդևանյանի խոսքով՝ Սահմանադրական դատարանը հաստատել է «Քաղաքացիական պայմանագրի» կողմից վարչական ռեսուրսի չարաշահման, իշխանության ներկայացուցիչների կողմից ատելության խոսքի տարածման փաստերը, ինչպես նաև ընդունել է, որ Հակակոռուպցիոն կոմիտեն լիազորություններ չուներ հրապարակելու քաղաքական ուժերի հեղինակությանը հարվածող ձայնագրություններ։
«Դրանցից մեկը նշեմ՝ վարչական ռեսուրսի չարաշահում տեղի ունեցել է, և սա ոչ թե պարզապես մեր գնահատականն է, սա այլևս Սահմանադրական դատարանի որոշմամբ արձանագրված է։ Ատելության խոսք իշխանության կողմից տարածվել է, և դա այո, հակասահմանադրական վարքագիծ է եղել»,- մանրամասնել է նա։
Նա հիշեցրել է, որ Սահմանադրական դատարանն արձանագրել է, որ Հակակոռուպցիոն կոմիտեն լիազորություն չուներ հրապարակելու քաղաքական ուժերի հեղինակությունն արատավորող ձայնագրություններ:
«Հակակոռուպցիոն կոմիտեն ձայնագրություններ էր հրապարակում և արատավորում էր, օրինակ, «Ուժեղ Հայաստան» կուսակցությունների դաշինքին, միշտ դա նշելով, չնայած նրան, որ ոչ մի կապ մեր ուժը դրա հետ չի ունեցել, և այս պնդումը նորից եմ կատարում: Սահմանադրական դատարանն արձանագրել է, որ նման իրավունք, լիազորություն չուներ հակակոռուպցիոն կոմիտեն, այսինքն չէին կարող այդ աստիճան կուսակցության հեղինակությանը միջամտել, անմեղության կանխավարկածը նսեմացնել»,- պնդել է Վարդևանյանը։
Փաստաբանը նաև մատնանշել է, որ դատարանը հաստատել է, որ նախընտրական շրջանում սոցիալ-տնտեսական բարեփոխումների իրականացումը որպես սոցիալական կաշառք դիտարկելը ողջամիտ է և արձանագրել է դիմումում նշված հիմնական խնդիրները։
«Մի քանի այլ հանգամանք էլ, նույն սկսած սոցիալ-տնտեսական, այսպես ասած, բարեփոխումները հենց նախընտրական շրջանին մոտ կամ հենց այդ ժամանակահատվածում իրականացնելն էլ, որպես սոցիալական կաշառք դիտարկելը, այո, ողջամիտ է, և դա պետք է հետագայում կանխարգելվի։ Այսինքն, այն հիմնական խնդիրները, որոնք մենք նշել էինք մեր դիմումում, հաստատվել են Սահմանադրական դատարանի կողմից, բայց վերջնարդյունքում, ցավոք, ամենակարևոր հարցերից մեկը, նույն օրինակ մանդատների բաշխման կարգի փոփոխությունը տեղի չունեցավ»։
Խոսելով պատգամավորական մանդատները վերցնելու որոշման մասին՝ Վարդևանյանը շեշտել է, որ դա ընտրողների հանդեպ պատասխանատվության ստանձնում է։
